U MLA ka Mawhati Constituency, u Dasakhiatbha Lamare da pyntip u wa da dep wow yoh yei mynjur na ka World Bank wow chna noh 40 Km u sarok 2-lane Umsning-Jagi Road uwa em 80 Km wei i mang poisa man i T. 134 klur.
Da ong u wa i yakhun wow yoh ya katai ka sarok toh nadooh wa man u kam u MLA ha u snem 2018, wei pynsñiaw u leh ya kiwa boon ki kyndon na ka World Bank wa hap wow pynbiang, wei iwa sah kattæ toh wow pyndep sa du kattu katni ki kot ki sla kiwa yooluti wow pyndep noh ha kani ka tayaw, wei da ong u wa chwa wow kut uni u bnai Wisu, ka chnat PWD daw khut noh ko ya ka Tender yow pynkreh ya utai u sarok.
U Dasakhiat da pynsñiaw u wa sñiawsih wa ha kini ki snem wa da dep, ym em da ye wow pynmankaam kamwa da yooluti, wei da paanmaap u leh na kiwa chong chnong hajrong ini. Da pyntip wa iwi na i daw wa da pynslem ya utai u surok toh neidaw wa em ki kattu katni ki chnong kiwa chem yei eh wow yoh yei thaw.
Ynne ka sngi neiliang yong kiwa yahkhmat ka Mawhati NPP Block da yachem ki ya u MLA wow yaklam hajrong ka sarok 2-Lane, heiwa u Dasakhiat da pynche u yei eh wei da pyntip u leh yei long i man yong katai ka kaam.
Neiliang u R.M. Mukhim uwa man u Working President ka NPP ha Mawhati da pynsñiaw u yei thrang yong ki paidbah wa toh u yoh ya utai u sarok, wei i yachem toh wow pyntikna na u MLA wei da pynrap u wa i yachem man ko kawa sñiawsuk neibhah u MLA da pynsñiaw u yei long i man yong i kaam. Da pyntip u wa u MLA da kular u wa ka Mawhati ym dooh ko ya utai u sarok.
U General Secretary ka NPP Mawhati, u Donboklang Kharnaior da ong u wa kam uwa yahkhmat da yachem u wa u MLA yow tip yei long i man ki Scheme wa kyrpang ya u sarok Umsning-Jagi Road wei wow pynche cha ki paidbah.
Da ong u wa ya u sarok, ki paidbah da yooluti ki wei ki paidbah leh yang ki wow booh noh ya u mooyurim wow kreh noh ya u sarok.
