Jowai: Ka Chilliangraij SSA Upper Primary & Govt. Lower Primary School Jowai ynne ka sngi da pynman ki ya ka Swachh Bharat Swachh Vidyalaya programme. Ya kani ka program da pynman kam chi bynta wow pynem warom ya ka World Environment Day 2017, ya kani ka program da sdang deiwa pynman chwa ya ka yalang wa tbian kawa da pyllai da ka Handakaru Iakai kawa man ka Head Teacher yong kani ka skur.
Da yoh yei klam wa tbian na u Oriland Shylla Member yong ka SMC, uwa da kyrsu kyntu u ya ki manbei manpa, ki khynnah skur yow man ki kiwa kitkhia nei bynta yow pynman ya ka chnong ka thaw kawa khooid wa jngiar, kamjooh yow maya ya ki mar thung mar tep kam ki syntu ki skud ki dieñ ki siej kiwa wanrah ya ka la-ær kawa khooid yow riñ mynsien.
Da yoh leh yei klam na u SD Laloo u wa man kam u District Coordinator Community Mobalizer SSA uwa da ong wa kam kani ka program yada mariang da pynman da ki tnat waphær waphær kiwa man kam ki rongphong chisngi heh wei da ki hajar hajar tre ki symbe da thung du ha ka chisngi, tangwa boon na kini ki dieñ da man ki kiwa kut næ yap sepai du hadien kattu katni sngi, kamtæ ha kani ka sngi da booh u yei kyntu kynphaam ya waroh khamtam hawa thung ya ki dieñ emkam leh wow booddien ya kitu ki tre dieñ khnang wa kini ki dieñ u yoh ki u heh u san wei wow e myntoi won ya kiwa boon walang ha ki snem ki wow wan.
Ha kani ka program da puræ leh ya ka Pledge Reading da waroh hei yahkhmat ka Da I Lanong kawi na ki khynnah ambassador yong kani ka skur.
Hadien kani ka program pohyung ki khynnah kamjooh ki wa sikai wa kiwi kiwi da chim bynta ki hei wow lithung ya ki tre dieñ ha Loomkhliehchnong kamjooh ha i bynta yong ka Khloolangdoh, da pynkhooid pynpliah leh ya ki dieñ kiwa daheh dawan kiwa da dep thung ha ki snem wa da dep.
Ha kani ka program da em leh u A.Passah CRC, Gen Secy yong ka chnong.
Discussion about this post