Kam chibynta yong ka e sikai ya ki khynroo khyllood ka thaaiñ Satpator ha ki kaam chet, neiliang ka SURE da chimkhia ko leh kammon wow pynkhreh ya ki baam tynre wei kani ka e sikai toh neibynta 17 sngi wei ki jait hikai kiwa daw e ha kani toh ka rukom chet ya ki baam Indian, Chineses deilang wa ki baam tynre.
Iwi na i buit wa da pynyoo ha kani ka e sikai toh kammon wow pynriam pynmiat dur yei baam tynre cha kiwa wan chibynta na ki chnong waphær waphær yong kani ka thaaiñ Satpator kiwa wanrah leh ya ki baam tynre wa da pynkhreh wei yarap pynriam ya kini ki baam kiwa da chet da u Chef Lambhah Kma.
U Chef Lambhah Kma da ong u wa ki baam tynre toh kiwa da em chwa ki ha ki iwa emkaam yow man i doh i pran iwa chait wa khiah nadooh ki jhoor khloo wa ki soh khloo wei da kyrmen u wa ki dukan dai jadoh leh u sdang ki wow chimkhia leh kammon wow pynmiat dur yei baam manda e ki cha kiwa wan baam wei wow pynemkaam da ki jhoor kiwa pynchiat pynkhiah.
Ka Ilasiewdor Gashnga kawa man ka Program Coordinator Skill Training yong ka SURE da ong ko hanla ka man ko kam ka War tangwa hawa pait yei baam wa da wanrah dang em boon kiwa ka leh ymtip ko wei ym jooh yoo ko. Ki kattu katni ki jait baam tynre kiwa da chet da kiwa wan chah sikai toh i ta’æ Sohslung, Tham, u Soh Sten, Sohlkhein, u Pron, Jia Jekeng, Jia Herew, Jia Sohlewi, Jia Lekedung, Jia Chan, Jia Sohlachit, Chiah Koi wa Sohrma. Hawa yatoh won wa ki jait tpu won da wanrah da u puri wa u resai.
Du ha thaaiñ War Jaiñtia leh ki baam tynre em ki boon jait wei phær ki na Nongtalang wa kiwa em cha thaaiñ Padu, Satpator wa Amwi.
Ha kani ka sngi da emlang leh u Lambormi Suchen, Skill Development Officer West Jaintia Hills District uwa da yaroh ya ka SURE kawa da ye wow pynlai ya kani ka e sikai. Kamtæ da kyntu ya kini ki khynroo khyllood manda pyndep ki ya ka e sikai wow sdang ki iyi re iyi ha ki chnong yong ki.
Kiwa wan chimbynta ha kani ka e sikai toh kiwa na ka chnong wa marjan kum na Amlari, Jong U Chen, Amjalong, Nongtalang neitæ ki chnong kiwa haap hapoh ka Syndai kam ka Syndai Kmai Chnong, Syndai Mission wa Syndai Lyngkot.
Discussion about this post