Jowai : Ka Meghalaya Co-operative Apex Bank, Ladthadlaboh Branch ynne ka sngi ha ka Ladthadlaboh Presbyterian Higher Secondary School kam chi bynta ka World Literacy day da pynman ki da ka “Financial Inclusion on Various Bank Products” hei thmu wa hadien wa man ki ki bru wa tip u puræ puthi emkaam ki leh u man kiwa sñiawthooh ya ki kaam poisa poilaiñ.
Ha ka yalang da em ki khynnah puræ ka klass XI yong kani ka skur kiwa da yachim bynta chongchit ha kani ka sngi khamtam hei yatoh wa ka Student Loan namo ka ram neibynta ki khynnah wa lai puræ kiwa ki bank katni e ki.
U Branch Manager ka bank u ma L. Nartiang hei klam yong oo da pyntip u cha ki khynnah yei emkaam u wai ya ki Bank Account ym du yei chim loan kamjooh leh yow pynmyllien ya ki u sdang noh ki u pyllang poisa.
Ya ki jingkylli wa booh ki khynnah hei yatoh wa ki loan wa da jubab da u T. Thangkiew, DDM, NABARD, u ma M. Passah Area Manager, Jaiñtia Hills, MCAB, Shillong kamjooh wa u Branch Manager.
Ki mat wa kongsan bha wa da yoh u pynche cha ki khynnah ha kani ka sngi hei yatoh wa ka Student Loan toh
- Ya ka sut haap su da ki bei ki pa katwa ya kawa sah (Principal) won ye u su hadien wa dep puræ wei da sdang kreh ki khynnah.
- Ka loan toh kawa e katkam ka bai puræ (Educational Fees).
- Ya ki loan wa hapoh 5 Lak ym emkaam u bynda da ki thaw, ki yung wa kiwi kiwi.
- Ka sut da kheiñ 13.5 % wei ye ko u kylla chong hei katwon heh ka loan.
- Ya ka loan toh u su hapoh 5 snem.
Kamtæ neiliang u ma Thangkiew da pynchlur u ya ki khynnah kiwa kwah u lai puræ wa ymtoh u artatien ki u chim ya kani ka loan lada kwah u lai cha khmat hei puræ puthi yong ki.
Da em leh ha kani ka sngi ki dkhot ka School Managing Committee wa ki wa sikai kani ka skur.
(Content Sponsored by MCAB, Ladthadlaboh Branch)
Discussion about this post