Ki MLA ka Congress hapoh ka jylla da kular ki hakhmat kiwa sikai SSA wow rah biang ya ki mat dawa kiwa sikai hapoh ka dorbar chna aiñ ka jylla ka wow kut ha ka 17 tarik.
Neiliang ki MLA ka Congress kiwa kynthup ya u HM Shangpliang, u George Lyngdoh, u Mohendro Rapsang wa u Zenith Sangma hadien wa tip ki yei yakhih kiwa sikai SSA, ynne da lai yachem ki ya kini kiwa sikai ha Madan Malki, Shillong.
Neiliang u HM Shangpliang da ong u wa kam kiwa mihkhmat daw yakhun ki wow yoh kiwa sikai ya i hok yong ki, deiwa pynrap leh wa ka sorkar toh u pyndep ko ya iwa da kular ko khnang wa kiwa sikai wa ki khynnah ym chem chitom ki.
Da ong u leh wa ka sorkar toh u pynkreh hok ko katkam wa da kular wa da pynbait da ka chnat puræ puthi wei da ong u wa i em ka liang pyrchah u man i kam ka tanghæng cha ki chkoor ka sorkar neibynta ki paidbah.
Chooh chooh da ong u wa ka liang pyrchah ym elaad ko ya ka sorkar wow leh ko katwa ngait ya kiwa sikai SSA wei kam kiwa mihkhmat daw chimkhia ki yeini neibynta i bha i miat kiwa sikai ka jylla neibhah wa nadooh ki snem wa dadep kiwa sikai SSA da chem chitom ki wei yang ki hei yooluti wow yoh ya i hok yong ki wei ini waroh dang man i iwa sahteiñ.
