Ka 32nd Annual General Meeting yong ka Seiñ Kur Suchiang da pynman ya ka ha ka chnong Sohkymphor ha ka 7 tarik uni u bnai hajrong ka phang “Hei hok Chaphrang Deilang, hei phooh i phieñ” heiwa ya ka yalang da pynlai da u Goldenstar Suchiang.
Ya i klam waiphang da yoh na u President yong ka Seiñ Kur, u Carmel Suchiang, heiwa da kubur wa ki Kur Suchiang wa ki Simpli man ki chi doh chi snaam hadooh katni wei ka Kur Suchiang wa ka Kur Simpli u lailang ki ryntih wow pynku ya ka kur wei wow yada nei chogsang chongmaa.
Da yoh i ngoohblai na u Markham Suchiang, Treasurer ka seiñ kur wei hadien ini da pynhær ya ka lama ka kur da u kongsan, u Jonathan H. Suchiang, ryngkat ki Waheh Kur, wei da rwai leh ya ka Anthem yong ka kur.
Ya ki kyntien pdiang burom da yoh na u Hastuni Suchiang, wei ya ka parom wa tbian ka Seiñ Kur Suchiang Sohkymphor Unit na ka Nangtei Suchiang Sohkymphor Unit, katwa ya i rwai pdiang burom da e da ki khon khynroo khyllood ka Seiñ Kur Suchiang, Sohkymphor Unit.
Ha ka yalang da yoh leh i klam na u Waheh Tirot Sing Suchiang hajrong ka phang “Ka Kur Suchiang ka chim ko ya i jait na ka bei” heiwa da ban joor u wa neidaw wa ka Kur Suchiang chim ko ya ka jait bei, i burom ka kur chong i ha ki kynthai, khamtam wow yada na i chongkha khleh iwa ye u pynjæd ya i long i man ka kur.
Da puræ ya ka Financial wa Annual Report yong u snem 2025 da u General Secretary, u Dr. Damewan Suchiang. Da e ya ka Report hajrong ki rai yong ka EC ha kani ka yalang khnang wow yada na i chongkha khleh, ka Seiñ Kur da chim ko ya ka rai wow pynkhor hawa e NOC ya kitu kiwa yoh kurim khyllah jait, ya kiwa e jait cha u pa na ka Kur Suchiang, heiwa ka kur da rai ko wym e NOC ya ki.
Ya kani ka yalang da sakhilang da u MLA ka thaaiñ, u Kyrmen Shylla, uwa da yaroh ya ka Kur Suchiang hajrong i lai luti yong ka ha kini ki 32 tylli ki snem wow pynku ya ka imlang sahlang.
Ha kani ka sngi da saam leh ya ki Award cha ki khon ka Kur Suchiang kiwa da leh bha ha ki Exam waphær waphær.
Da yoh leh i klam na u President ki Waheh ka Dorbar Kur Ri Jaiñtia, u Khroo Lamsalanki Pariat, uwa da kitbok kitrwiang ya ka Kur Suchiang wow ku chaphrang wei wow yada ya ka burom ka kur wa chim jait na ka bei.
Chooh chooh da yoh i klam na u Waheh Chnong ka Sohkymphor, u Lomis Langstang wa na ki Waheh ka Kur Simpli, khamtam na u Kor Simpli uwa da kubur ya i klam u President wow lai ryngkat iwi.
Da yoh leh i klam na u symbood kongsan, u Dr. Eleazer Suchiang, uwa da klam hajrong ka phang wa em i maa lada chongkha chi kur chi kamai katkam ka stat Science.
Da pynphooh pynphieñ ya ka yalang da ki put ki tem, ki rwai ki siaw wa ki chaad na ki Unit waphær Ka Seiñ Kur Suchiang wei khamtam i temsur da u DJ Banshan Suchaing wa ka DJ Lily Sawian.
Ha i klam khaddooh na u kongsan, u Jonathan H. Suchiang (Joint Director, Fishery, Govt. of Meghalaya), da yaroh u ya ka Kur Suchiang hajrong i lai luti ko ha kini ki 32 snem wei da kitbok kitrwiang u wa ka kur u janai chooh chooh ko ha ki snem wow wan wow kyntu kynrong ya ka imlang sahlang.
Ha kani ka yalang da pynskem leh ki ya dkhot ka Central Body neibynta ka samoi krehkaam 2026-2028 da u kongsan, ryngkat i sakhilang u symbood kongsan wa u Ex-General Secretary, u Hasin Alfon Suchiang (Secretary wa nyngkong dooh ka Seiñ Kur Suchiang).
Kiwa kitkaam wa da jied neibynta ka samoi krehkaam 2026-2028 man ki kamni ha wah:
U Carmel Suchiang – President
U loohimi Suchiang- Vice President
U Dr. Damewan Suchiang – General Secretary
U Dr. Blessing Suchiang – Joint Secretary
U Daohipaia Suchiang – Assistant Secretary
U Lewanson Suchiang – Adviser
U Markham Suchiang – Treasurer
U Samuel Suchiang- Publicity Secretary
U Lasting Suchiang- Statistician Secretary
U Wadbormi Suchiang wa u Tipki Suchiang – Auditor
Ki Executive Member kynthup ki ya ki Waheh Kur ryngkat ki Chairman wa ki Secretary yong ki Unit waphær waphær ka Seiñ Kur Suchiang wa ki dkhot wa pura ka Seiñ Kur Suchiang Central Body.
Ya ki kyntien khublei da yoh na u Dr. Blessing Suchiang, wei da pynkut ya ka yalang deiwa pynhiar ya ka lama ka kur wei da e kti ya ka lama ka Seiñ Kur Suchiang cha ka Saphai Unit, ka Unit wow pdiang ya ka 33rd Annual Meeting neibynta u snem 2027.
Discussion about this post