Ka mukotduma heiyatoh wa i tih mooyong pyrchah aiñ wa da leh daka Meghalaya High Court hi, hadien wa da thung ko da u Justice B.P. Katakey (Retd) yow booddien hadooh katwon wa da chimkhia ka sorkar wow pynkrehkaam ya ki hukum ka Supreme Court kamjooh leh ka NGT, da phah ya ka bui (Preliminary Report) da u Justice Katakey kawa da em 41 sla heiyatoh wa ini i kaam.
Da phah leh ya kiwa boon ki kot ki sla yow kyrchaan yeiwa em hapoh ka Report wei ya waroh iwa em hapoh kani ka Report neiliang ka yung bichaar ym pu phah chwa ko cha ka sorkar kat wym pu dep u pait bniah ya kani ka Report kawa da yoh haka 23 tarik uni u bnai.
Kani ka Report da ong ko wa lait nei sdang pynkrehkaam ya ka Meghalaya Minerals (Prevention of Illegal Mining, Transportation & Storage) Rules, 2022 iwa da leh ka sorkar haka 24-03-22, ym em bood ya iwon iwon iwa da phah hukum daka Supreme Court waka NGT. Wei ini kynthup lang ko ya ka sorkar Meghalaya, ka State wa Central Pollution Board, ka North Eastern Space Application waka Regional Office ka Ministry of Environment, Forest & Climate Change.
Hapoh kani ka Report da tyrwa leh kammon wow leh yow pyntikna wa da bood ya ki hukum ka Supreme Court deilang waka NGT, kamtæ waroh ki bor sorkar wa toh u pait yeini hap ki wow leh yei kaamram yong ki hapoh soo tayaw nadooh ka 24 tarik uni u bnai.
Ya u Justice Katakey da phah ya oo wow pteiñ u wow pait yei pynkrehkaam ya ki hukum ka Supreme Court waka NGT wei na ki por cha ki por daw wan u cha Shillong iwa hap wow pait da ka sorkar wei wow booh bru wa man kam u Secretary (MCS) wow yarap ya u Justice Katakey ha ini i kaam.
Da hukum leh yaka sorkar wow puræ ya ka Paragraph 3.2 ka Report yow tip ki iyi wa toh u leh ki.
Ya kani ka mukotduma daw chong bichaar biang ha ka 21-06-22.
