Hadien wa chiboon i beiñ khamtam heiyatoh wa i rai wow e yarap ya kiwi ki ri ya i tika COVID-19, ynne ka sngi neiliang kawi na ki karkhana wa chna ya i tika COVISHIELD, ka Serum Institute of India (SII) da ong ko wa ym em u chalan ko ya i tika deiwa booh ya ki paidbah ka ri hei maa.
Ka SII da pynche ko deiwa ong wa ha u Duyatra (January) 2021 da em chiboon ini i tika wei neidaw wa dang sdang wot i e tika wei da sdang leh wow duna bha kiwa chah ktah ha ka khlam COVID-19 katwa kamtæ ki paidbah chirup wa ki bru chemphang da yoo ki wa da sdang jop ya ka khlam.
Da ong ko leh wa ha i jooh i por da yoo wa kiwa boon ki ri da emkaam yarap bha ki wei ka sorkar pyrdi da yaleh ko wow e yarap ya kiwa emkaam heiwa da sdang ko wow yahkhmat hei yakhun ya kani ka khlam nadooh wa sdang ko ha u 2020 wei katni da yoo yei yoh yarap kylliang won na kiwi ki ri.
Da ong ko leh wa kani ka khlam ym kut ko du hapoh ka ri næ wei ymye wow man chngaaiñ kat wympu ye wow pyntikna wa ka pyrthai waroh kawi ye ko wow pyndooh ya ka wei ka SII leh em ko leh hapoh ka COVAX (i thong ka WHO wow pynpoi tika cha waroh ki ri) iwa da pynman ya ka leh wow em i kitkhlieh wow yarap pynbiang tika leh ya kiwi ki ri yow jop ya ka khlam.
Heijooh i por da ong ko wa ka India man ko kawi na ki ri wa boon bru dooh ha ka pyrthai, katwa kamtæ ymye wow pyndep yei e tika hapoh 2-3 bnai na ki daw wa boon, deiwa pynrap wa daw chimpor 2-3 snem wow yoh tika waroh ki bru ha ka pyrthai.
Ka SII da ong ko leh wa da ye ko wow e hadooh 200 Million Dose hanla da yoh ya ka EUA (Emergency Use Authorisation) du ar bnai hadien wa yohbor ki karkhana na USA wei hawa wyrchaw yeini waroh ka SII da man ko hei kyrdan wa 3 ha ka pyrthai wow ye u e ya ki tika. Wei u pteiñ hi ki wow pynboon yei pynmih tika deiwa kheiñ kyrpang ya ka India deiwa yooluti leh wow yarap pynyoh tika ya kiwi ki ri leh.
Da ban joor wa ym jooh em chalan ki yei tika deiwa mylliñ yeiwa emkaam ki bru ka India wei u pteiñ u leh katwa ye yow kyrchaan yeiwa emkaam ka ri.
