Ka lieñsuiñ ka Spice Jet kawa da toh u hiar ha Umroi Airport ynnin kawa wan na Delhi, da hap ko wow hiar syndet (Emergency Landing) ha Guwahati Airport hadien wa chah pynytieñ wa em Bomb ha ka.
Kani ka lieñsuiñ toh kawa kit ya ka ya 75 ngut ki bru wei da hiar ko ha Guwahati Airport ynnin heipor 1:00 waje i sngi.
Neiliang ka Airport Authority of India da pyntikna ki wym em chem ki iwon iwon i jait wa ye u pdung hapoh kani ka lieñsuiñ wei da pyntikna ki leh wa ini i maham toh iwa da poi lyngba u X (Twitter), wei neiliang ki Air Traffic Control da pyntip ki wut wut yeini, kamtæ da phah hiar ya kani ka lieñsuiñ ha Guwahati.
Manda poi hiar ko ha Guwahati da booh ya kani ka lieñsuiñ cha i thaw wa da pynkhreh kyrpang wei da psiah ki bru wow lum ka na khleh ha tre yow thooh boi em Bomb hapoh tangwa ym em chem iyi iyi.
Ini da man ko la 6 sien wa da em wa maham em Bomb ha ki lieñsuiñ ka Spice Jet ha kini ki sngi wa da lai tangwa deiwa kheiñlang ha waroh ka ri, da em palat 250 sien wa chah pyntieñ em Bomb ha ki lieñsuiñ iwa da pynthut yei lai i wan ki bru wei da wanrah leh yei dooh nong wa boon iwa da kheiñ hadooh Rs. 33 klur chisien wa jia kamni.
Discussion about this post