Neiliang ka DC (Supply) ka East Khasi Hills da pyntip paidbah ko wa da dep wow phah pait bniah ha ki Laboratory ya u khoo wa suba toh uwa da khleh lang wa u khoo Plastic uwa da kem da ka yung krehkaam ka Deputy Commissioner (Supply) ha ka 23-06-21 hadien wa em ka seiñ wa ujor wa u khoo wa em i pyrtuid ‘Tripal Five Rice Brand’ wa wanrah da ka dukan Triveni Store toh u khoo Plastic.
68 churia uni u khoo da kem da u Superintendent of Supply, East Khasi Hills, Shillong. Wei yei nongmuna da chim da u Assistant Commissioner of Food Safety, Shillong.
U Assistant Commissioner of Food Safety, Shillong da pyntip u wa ya ki nongmuna da phah cha u Analyst ka sorkar Assam wa Meghalaya, State Public Health Laboratory, Bamunimaidan, Guwahati ha ka 25-06-21 wei da phah leh cha ka State Food Testing Laboratory, ka sorkar Meghalaya, Pasteur Institute, Shillong.
Hadien wa yoh ya ka Analysis Report, ka Report da ong ko wa ya ki nongmuna khoo wa da yoh toh kiwa biang katkam ki kyndon ka FSS Regulation, wei ym em chem ya ki 44 tylli ki dawai (Pesticide) wa khang u pynemkaam (wa Test da ka GCMS/MS) wa 7 tylli ki jait Pesticide (wa Test da ka LCMS/MS) heiwa ya kini leh ym em chem ya ki, kamtæ u khoo man u uwa biang wow baam katkam ki kyndon wa da dep Test.
Da yoh leh ya ka Analysis Report ha ka 10-09-21 wei katkam wa chem kani ka Report uni u khoo toh uwa biang katkam ki kyndon Regulation of Food Safety and Standard (Food Products Standards and Additives) Regulations, 2011 wa ka FSS (Contaminants, Toxins and Residues) Regulations, 2011.
Kamtæ hajrong ini waroh da pynlait biang ya uni u khoo.
