Ka NHAI ha u Duyatra (Jan) 2021 da pynmih ko ya ka hukum kawa ong wa ki kari wa khlem FASTag daw chim ya ka dan (Toll Fee) ar chah kam ka kuna, iwa mut wa lada ki kari jooh su ki T. 30 nachwa, katni won lada ym em FASTag ki daw haap su ki T. 60.
Ya kani ka hukum da sdang wow pynkrehkaam ha Tollgate, Ialong nadooh ka 14-15 tarik uni u bnai wei ini da wanrah i yei chrai i kusa hapyrdi kiwa kamai kari kiwa da kyntait wow su ya kani ka kuna.
Ha ka 15 tarik neiliang ka seiñ JSM da hiar ko cha kani ka thaw wei hadien wa yaklam wa kiwa kreh ka Tollgate, kiwa mihkhmat ka Dorbar Chnong Ialong da chim ya ka rai wa ki kari kamai ymtoh u su ki ya ka dan kat wympu pynbait ya ini i kaam hapyrdi ka NHAI, u DC ka West Jaiñtia Hills, ka Dorbar Chnong wa ka seiñ.
Ynne ka sngi hawa yaklam wa u Accountant ha kani ka thaw, u Kaluram da ong u wa kani ka hukum toh kawa rim wei manda pynkrehkaam ya ka, ki paidbah da kyntait ki wow su ya ka T. 60 kawa man kam ka dan wa ka kuna wei da kyntait ki leh wow booh ya ka FASTag ha ki kari.
Da ong u wa nadooh ka 15 tarik ym em de u chim dan na kiwa boon ki kari kamai wei ynne ka sngi neiliang ka yung krehkaam ka NHAI kawa em ha Shillong da thoh ko cha u Deputy Commissioner ka West Jaiñtia Hills hajrong ini.
