U tre i yung wa iñ ha Police Bazar iwa da jia hei sngi ka 14 tarik, u Amit Singhania da kyntait wei da beiñ u ya ki bru wa da pynbaad wa i iñ i yung toh iwa leh chynnam yow yoh u lai kam ya ka Insurance.
Da ong u wa ini i yung u ym em booh Insurance ki wei ye ki bru wow pait ya ki kot ki sla.
Ini toh hadien da em ki bru wa pynbaad ha ki rynsan Social Media wa ini toh iwa leh du yow yoh u lai kam ya ka poisa Insurance.
I tympleh yei diñ toh iwa da pteiñ hadooh ynnin ka 16 tarik neidaw wa em ki bynta wa sdang ma sdang kop i diñ neidaw wa em boon ki kot, ki that wa ki Plastic wei ya kani ka yung da pynemkaam leh kam ka kudam yow booh ya ki tiar Furniture wa kiwi ki tiar Plastic.
Katkam wa man kattæ ini i diñ da pleh i hadien 40 kynta i yaleh hadooh wa da hap wow wan yarap wa ki chipai ka Indian Army, Air Force wa BSF wei da embhah hanla i diñ toh iwa kyrooh bha tangwa ym em yoh laad i wow poor cha ki yung wa em chajan.
I Amit da ong u leh hadooh kattæ ym pu tip katwon dapoi i dooh nong na ini wa jia deiwa pynsñiaw leh yei sñiawsih wa da dooh yei mynsien yong uwi u bru uwa da ye wow sai deiwa tympra yei chram nadien neibhah ym ye de u psiah chapoh wa joor palat i diñ wa i tdem.
Chooh chooh da pyntip u wa ya i bynta wa nakhmat ini i yung daw hap u tympra noh hadien wa da pyndep yei takit neibhah ym em de man chngaaiñ wow ieh hi-eh.
Da e khublei u leh ya waroh kiwa da yarap deiwa ong leh wa slem ki kari tympleh diñ u poi toh neidaw wa khynnia ware ka thaaiñ Khyndailad wei ym e laad ki bru ya kini ki kari wow lai ki hadooh wa sahkut ki chiteiñ kynta.
Da kyntu u leh ya kitu kiwa da pynbaad boon jait wow pyrkhat ya ki kiwa da khia bha i sñiawsih wei ymtoh u leh kyndeh yei sñiaw ki bru ha kam ini i por.
Discussion about this post