U Montri Rangbah ka jylla, u Conrad K Sangma ynne da ong u wym em khang wow tih moo, tih chyiap tangwa da hap wow bood ya ki kyndon ka aiñ neibhah ym em pynlait ka aiñ wow leh yeini hanla man iwa khian leh khlem da yoh yaka Quarry Permit næ ka Mining Lease.
Da ong u wa kam ka sorkar toh i kaamram wow sikai ya ki bru wow tip ki kammon wow yaleh yow yoh bor ki.
Da kdaw u wym em kyndon hapoh ka a Meghalaya Minor Minerals Concession Rules (MMMCR), 2016 næ hapoh ka Mines and Minerals (Development and Regulation) (MMDR) Act, 1957, yow chah u tih moo, tih chyiap khlem da yoh bor hapoh ka aiñ MMMCR, 2016, da pynche u Conrad hapoh ka dorbar chna aiñ ynne ka sngi.
Da ong u leh wa da em ki hukum wa da pynmih da ka Supreme Court kamjooh ka Meghalaya High Court wa emkaam wow yoh Environmental Clearance wei kini ki aiñ waroh toh kiwa krehkaam hapoh Meghalaya kamjooh ki thaw wa em hapoh ka 6th Schedule.
Ka MMMCR da kdaw ko ya ki kyndon kammon wow pynkhreh yei rukom tih namo ka Mining Plan, i yoh Environmental Clearance, Pollution Clearance hapoh ka aiñ Air & Water Acts wei da emkaam leh wow yoh bor na ki District Council wa kiwi kiwi.
Da e nong muna leh ya ka mukotduma wa da yaleh daw kiwa tih moochuni, tih moo na War Jaiñtia heiwa ka High Court da klam che ko ya ki kyndon aiñ wa hap u leh katkam ka aiñ yow ye u chalan cha baar ri.
Chooh chooh da em i pynbna da ka Ministry of Environment, Forest & Climate Change ka sorkar India kawa da pynyklla leh yaka Environment Impact Assessment Notification, 2006 wa da pynbna haka 15-01-2016 heiwa da ong wa emkaam yaka Environmental Clearance yow tih ya ki mar pohkhyndaw wa tip kam ki Minor Minerals wa kynthup ya u chyiap, u moo, u moochuni ki wym toh wa pynemkaam ha ki karkhana khlem da kheiñ leh hadooh katwon heh i thaw wa tih.
Hachwa ini da emkaam Mining Lease wa Environmental du ya ki thaw wa heh 5 Ha chaneiñ.
Da kdaw u leh yaka hukum ka Supreme Court kawa da pynmih haka 03-07-19 kawa da ong wa ka aiñ Mines and Minerals (Development and Regulation) Act, 1957 toh kawa krehkaam hapoh ki thaw wa man Sixth Schedule wa kyntup yaka Meghalaya iwa mut wa kiwon kiwon ki kaam tih mar pohkhyndaw hap wow booda ya kani ka aiñ.
Da pyntip u yow tih chyiap, ka sorkar jylla da wanrah ko da Rule 4 ka MMMCR, 2016 kawa da pynkylla da sorkar haka 04-07-22. Kani ka kyndon da pynkylla neidaw nachwa ym chah wow tih chyiap hapoh 100m na ka wah tangwa deiwa pynkylla da chah wow wan ki bru wow paan bor yow leh yeini wei ka sorkar u yarap ko ya kitu kiwa wan chakhmat yow leh yeini.
Discussion about this post