U Montri wa pait ya ki kaam pohyung yong ka jylla, u Lahkmen Rymbui da ong u wa ki pulit ka jylla Meghalaya da chimkhia ki wow paitbniah wei da pynkhlan leh ya ka chnat lai thooh stat yow pyntikna wa ki Jihadi ym yohlaad ki wow leh ya ki kaam pyntieñ ha kani ka jylla.
Ha kini ki kajiak sngi wa da dep, ki pulit ka Assam da yoh ki wow kem hadooh 12 ngut ki Jihadi kiwa toh na ka Al-Qaeda (Indian Sub-Continent) wa ka seiñ lehnoh na Bangladesh, ka Ansarullah Bangla Team (ABT), kiwa leh ya ki kaam pyntieñ ha katai ka jylla wa marjan wa em ya u pood wa jrong wa ka jylla Meghalaya.
Ini i yoh kem ya kini ki Jihadi da pynsñiawkhia leh ya ki kynhun seiñbhalang ka jylla, neibhah ka Meghalaya ym em ko ya ki aiñ ki wow pynrkhiñ yei psiah i mih ki bru kiwa na baar.
Hawa klam cha ki laad pathai khubor ynne ka sngi, u Rymbui da ong u wa ka sorkar da pynkhlan ko ya ka chnat Intelligence wei kamjooh ki paidbah u paitbniah lang ki lada em iwon iwon i chon khmat yow pyntip cha ki pulit wow leh yeiwa emkaam. Da ong u wa ini da man i maa ym du ya ka jylla tangwa ya ka ri waroh kawi, wei ki chnat Intelligence yong ka sorkar pyrdi wa ka sorkar jylla da ya krehlang ki.
