Shillong: U wa yahkhmat yong ka NPP uwa man leh u symbood montri rangbah ka jylla, u Prestone Tynsong da ong u wa ha i yakrehlang yong kiwa boon ki party ha ka sorkar synrop ym mut i wa ha ka Election leh daw kyrchaan bait du ya uwi u kyrtong neibhah wa ym em iwon iwon i yatoh lok wow leh kamtæ wei kiwon kiwon ki party em ki ka hok wo pynyieñ ya u kyrtong ha ka election.
Yeini da ong u Prestone hadien wa mih ki khubor wa ka PDF wa ka UDP kiwa man ki seiñ saiñ pyrthai wa emlang ha ka sorkar synrop Meghalaya Democratic Alliance (MDA) da pynkhreh ki wow sai kyrtong ha ka Election chiteiñ samoi ha Ranikor Constituency.
U Prestone da ong u wa ki Party wa emlang ha ka sorkar ye ki u pynyieñ jar u kyrtong ha Ranikor wei lada kwah ki wow kyrchan ya u kyrtong ka NPP ka Party pdiang sñiawbha ko ya ki. Da pynrap u leh wa i booh kyrtong ka PDF wa ka UDP ha ka Election chiteiñ samoi man ko leh wow pynskem ya i khlanbor ka party wei man i katkam i stat yong ki.
Chooh chooh da ong u wa i yakhun pyrchah ki Party wa emlang ha ka sorkar MDA ym ktah i ya i yakrehlang wa ka sorkar.
Da pyntikna u leh wa ka Party ko wow sai da u MLA warim, u Martin M Danggo kam u kyrtong ka NPP ha kani ka Election na Ranikor.
Da kyntait u leh wa sdang piah ka party NPP ha Ranikor, wei da pynrap wa ym tip ka Party iyi iyi chaphang ini wei da ong u yeini hajrong ka phang kylli ya i kam u Pynshngain N Syiem wa kiwa kyrchaan yong waroh ki seiñ saiñ pyrthai kynthup na ka NPP wa kwah ki ya uwi u kyrtong wei da mih ki wow kyrchaan ya oo (Pynshngain).
Discussion about this post