Ka All Jaintia Commercial Vehicle Association (AJCVA), ka seiñ kiwa yah kari kamai ha i yahkhmat u President yong ka u Paila Kordor Lyngkot, ynnin ka 4 tarik da yoh ko u lai booh da i thoh wa rap kyrpang ha u Deputy Commissioner, West Jaiñtia Hills Jowai, wow khana yei eh wa chem kiwa yah kari. Neibhah katwa dang lai ki sngi kattæ dang booh ko ya kiwa khih mylla hei maa iwa khroo khamtam ya kiwa yah kari kiwa hap wow kset ya ki kari kamai yong ki kamwa kset masi kyrtong.
Ka Total Curfew kawa da pynbna wow kut ha ka 7 tarik uni u bnai da man ko kawa kut hei thoh hi-eh neibhah wa dang boon kiwa yoh kjut khlam COVID-19. Wym tip leh kat mynnu wow kut ka khang chnong, kamtæ neiliang ka Association da kyrpaad ko ya ki bor wa toh wow pait khamtam ya u Deputy Commissioner uwa toh wow pait wow yoo ya ka District waroh kawi wow sñiawbha ki wow pyrkhat haroh ya kiwa yah kari, deiwa e laad wow lai kamai noh ki katkam ki kyndon hanlada wym toh u lai kamai waroh ki kari leh, lada yoh kamai da ki Odd ki Even Number du 3 sien chi tayaw leh da man hi ko i kyrkhu ya kiwa im-ja na ka kaam kamai kari.
Ka Association da ong ko leh kiyi wow myntoi wow khang du ya ki kari kamai kiwa im-ja nei kaam kamai, katwa ki kari boon jait da dap ki yaw ki haat, ki sarok man ki kamwa jooh hi, yoo la kamwa kani ka Total Curfew toh du ya ki kari kamai don hi, namo du ki kari kamai hi-eh mo wa em kjut COVID-19? Kiwi tawon ki kari da tikna mo wym em kjut COVID-19 ki? Hei yong sakhiat lada pynkrehkaam katkam i yumut ka Total Curfew toh wow man ko salonsar.
Iwa sñiawphylla chooh chooh wa kammon kini ki kari boon jait yoh ki wow lai katwa ngait khlem em wa pait wa sylli katwa ya ki kari kamai won du wa mih cha sarok da chah pynchitom da chah daiñ kuna. Wa mih ki pli toh wym toh wa yaleh pyrchah ki, wa mih ki toh wa thngan ki khon ki kti ki. Lada toh ka Total curfew du ya ki kari kamai, toh u khana deiwa che yow tipsap ki pli kiwa yah kari kamai kammon wow thooh laad thooh luti. Lada ka sorkar ym pynkrehkaam ko solansar ya ka aiñ, kiwa yap toh ki khian ki nai kiwa kreh mylla.
Ka Association kyntu ko ya ka sorkar wow sñiawbha ko wow e yarap ya ki kiwa emkaam sakhiat wow yoh. Lada ka sorkar ym pyrkhat ko ya kiwa khih mylla daw poi i por wa ki khian ki dai daw yap thngan ki, ym na u COVID-19.
Ka kyrwoh na u Mihsalan Dhar, Publicity Secretary ka All Jaintia Commercial Vehicle Association.
