Khliehriat: Neiliang yong u Embilat Dkhar da wan u chakhmat wow pynche cha ki paidbah ka jylla Meghalaya wa dang man hi u uwi na ki dkhot yong ka seiñ Meghalaya People United Front (MPUF)-Khliehriat Circle.
Da ong u wa ym em u mih u naka seiñ MPUF kamwa da mih khubor ha kini ki hajiak sngi wa da dep, da ong u leh, “Nga dang man hi O u dkhot yong ka seiñ MPUF hadooh ynne ka sngi,” da pynsñiaw u leh yei sñiaw lyngngooh hadooh kattæ kattæ wa mih i pyrtuid yong oo ha ki khubor wa da mih seiñ u.
Kamwa da kam da u President warim ka seiñ (MPUF-EJHD) u Michal Chyrmang wa da mihlang naka seiñ u Embilat Dkhar uwa man kam u dkhot ka MPUF- EJHD, da pynche u Dkhar wa ym jooh em man u kam u dkhot ka EJHD wei man u kam u dkhot yong ka Khliehriat Circle donhi.
Kamtæ da pynsñiaw u yei diaw mynsien hadooh kattæ kattæ yei mih pyrtuid yong oo wa da mih seiñ u neibhah wa u President warim ka EJHD chwa wow pynmih khubor u ym em u khynjoh ktien u na oo chi kyntien leh.
