U Symbood Montri Rangbah ka jylla, u Prestone Tynsong ynne ka sngi da pyntip u wa kiwa chong chnong ka jylla wa yoh ya ka Scheme lyngba ka National Food Security Act (NFSA) yong ka sorkar pyrdi daw e yarap chooh chooh ko da u khoo heiwa ki manyung u yoh ki ya u khoo ha i dor T. 3 chi kilo, wei daw yoh chooh ki ya u khoo uwa ym emkaam wow su neibynta u Naisan wa Naiynru.
Da ong u wa lyngba kani ka Scheme da kynthup ya ki manyung kiwa duna hei yoh kiwa em ha ka jylla, heiwa da pyntip u wa em ki 21,45,145 ngut kiwa yoh myntoi na ka NFSA hapoh ka Jylla.
U Prestone da pynche u leh hajrong i klam u wow baam da i ja wow jhoor wa ym mut i wow ong wa kwah u wow klam beiñ yeiyi yeiyi tangwa wow em i kitkhlieh lang ha kani ka yakhun wow yada na i poor kani ka khniang khlam.
Hawa kylli won hajrong i pynbaad ka TUR wa da chem ko lyngba ka RTI yeiwa em kiwa khih mylla kiwa ym yoh yarap kamwa da kular ka sorkar ha u snem wa dadep, U Prestone da ong u wa lada kamtæ emkaam wow phah ki cha ka sorkar khnang wow tip ko.
Da pynche u wa em kiwa e da ki Bank Account wa ym krehkaam de wei ymtoh nei leh bakla ka sorkar, da ong u wa ka sorkar ymye ko wow pynpoi ha ka Bank Account wa bakla deiwa pynrap leh wa kitu kiwa toh u yoh ymtoh u ong ki wa ka sorkar ym em u pyntun ja ko ya ki.
