Ki pyrtuid yow man kam u kyrtong MP ka NPP na Shillong da sdang boon ki hadien wa da em ka khubor chawah chaneiñ wa u MLA warim ka Mawhati, u Dasakhiatbha Lamare leh da mih i hadien wa mih i pyrtuid u MLA warim ka Mawsynram u Himalaya Shangpliang wei ini wa dep won sa u MLA warim ka Umroi, u George B Lyngdoh uwa dang man u dkhot ka TMC.
U George ini wa dep da ong u wa ym em wa khut ya oo wei dang em hi u hapoh ka TMC.
Hajrong ini, neiliang uwa e ktien ka NPP, u Marcuise N Marak da kyntait u wa em i ya piah hapoh ka Party neidaw i jied kyrtong ya ka Shillong Parliamentary Seat.
Da ong u wa ka Committee daw tyrwa ko yei pyrtuid ki kyrtong cha ki heh ka Party wei daw jied ya uwa emlaad dooh wow jop.
Da ong u leh wa hapoh ka Party em boon kiwa yahkhmat wei ym dam hi u em i pynsñiaw na jar jiar ki liang wei daw yaklam ya ini waroh yow chim ya ka rai kawa yatylli, kamtæ da ong u wa ym em i piah.
Hawa kylli won yei mih ka khubor wa ki Dhar da pyrchang ki wow pynyieñ da u Dasakhiat Lamare kam u kyrtong MP, neiliang u Marcuise da ong u wa ym em sñiaw u iyi iyi leh yeini wei daw hap u wow kylli lada em chwa wow ong u iyi iyi hajrong ini.
Da ong u wa da em ki pyrtuid wei u Himalaya Shangpliang man u kam uwi wei i pyrtuid u Dasakhiat ym pu em sñiaw u ki.
Heijooh i por da ong u wa ym em i pynbor ya ka Party wei waroh da leh katkam wa toh u leh khamtam katni wa da yoh State President da uwa thymme.
Discussion about this post