Kawa chna phlim wa pawnaam na Ri-loom Jaiñtia, ka Simi Khongtiang ha kani ka tayaaw wa dadep da yoh ko ya i naam Best Director haka Prag Cine Awards 2024 neibynta wa pynwandur ko ya ka phlim wa pyrtuid ‘Ka Chithi’ kawa da pynman haka 16 tarik uni u bnai ha Jorhat, Assam.
Neiliang u Wyrta da yoh u wow yaklam waka Simi heiyatoh wa ini i naam heiwa neiliang yong ka da ong ko wa ym em poipyrkhat ko wow yoh ya ini i naam neibhah dang yooluti ko wow yoh naam ka phlim ha kiwi ki kyrdan kam ha ka Best Actress.
Da ong ko leh wa ini i yoh naam ko man i iwa dang sdang heiwa emkaam ko wow pynpliah chooh ya ki kreh yong ka ha i chna phlim wei ini i naam toh neibynta i burom ki paidbah ka Ri-loom Jaiñtia waroh kawi.
Heijooh i por da ong ko wa ha kani ka jooh ka sngi da yoh Phone ko heiwa da pyntip wa ‘Ka Chithi’ daw pynyoo ya ka ha ka Bengaluru International Film Festival 2024 ka wow man nadooh ka 29 tarik uni u bnai hadooh 7 tarik Wisu.
Neiliang ka Simi da kyntu ko leh ya kiwi kiwa chna phlim wow man ki bru wa yaichah wei wow pynlut por bha wow pyrkhat wei pynkhreh chwa wow riñ ya ka phlim yow suk manda sdang u riñ neibhah hap wow pynyatoh kyrdan wa kiwi kiwa da chna bha nadooh ki Trailer, i rukom riñ wa kiwi de.
Heiyatoh waka phlim wa daw chna ko neini, ka Simi da ong ko wa da sdang i kreh ya kawi ka phlim thymme kawa yatoh wa ka imlang sahlang ka wow klam yei wym hoi wow mylliñ yei tre.
Discussion about this post