Ka seiñ wa tip kam ka Lawei Ba Phyrnai da thoh ko cha u Publicity Secretary ka HNLC, u Saiñkupar Nongtraw yow pynche yei mih khubor dawa pynlait noh ya u dkhot warim ka HNLC u Julius Dorphang.
Da pynche deiwa ong wa ini toh i buit ki pulit wa kwah ki wow pynkut noh yei mynsien u Julius Dorphang yow pynkit pap cha ka Lawei Ba Phyrnai wei da kyntait ki leh wa phah ki ya kani ka email cha ka sorkar.
Da pynsñiaw ki leh yei kyrchaan ya ka HNLC deiwa paan yarap neibhah ka Lawei Ba Phyrnai ym toh kawa yoh wa kot wei ym ye ki wow thied tiar tympdung yow pynbna yei mih pythai yong ki kamtæ da emkaam yarap naka HNLC wow sñiawbha u phah ko ya uwi u chipai yong ka wow lai booh Bomb ha kawon kawon ka skur sorkar lane ka yung krehkaam ka MBOSE hapoh ka 1 tarik u Naisan 2022.
Da pyntip leh wa ka Lawei Ba Phyrnai toh ka synjuk kiwa sikai wa seiñ da ki 7 ngut kiwa sikai kiwa kynthup ya san ngut kiwa sikai skur, uwi uwa sikai College wa uwi wa jooh sikai ha kawi ka University hapoh ka ri wei da seiñ nyngkong ha ka 21-01-91 wei na kiwa boon ki daw wa i chah chet kylla ha ka sorkar ha ka 21-01-22 da rai noh wow pynkylla ya kani ka synjuk cha ka seiñ kieñ tiar wei hapoh 3 bnai da pynpsiah 30 ngut ki dkhot kiwa man leh ki khynroo kiwa da stat da tip tangwa ki wym yoh yei kaam kamai ja-kpoh.
Da kyntu ki leh ya ka HNLC wow murieh ya ini i ya krehlang waka Lawei Ba Phyrnai deiwa pynyoo yeiwa beiñ ya ka Lawei Ba Phyrnai.
Kam wow pynkynmoo wa ha ka email wa nyngkong wa phah da ka Lawei Ba Phyrnai cha u Montri Rangbah ka jylla, da beiñ ki ya ka HNLC deiwa ong toh ka seiñ wa khutia mutia kawa da wan pyndem katwa ka Lawei Ba Phyrnai toh ka wym ye ka sorkar wow phah pyndem.
