Shillong: Ka Mawphlang Labour Union (MLU) Central Body na ki por cha ki por da lai yachem ki wa ki bor pynlai ka Meghalaya Energy Corporation Limited (MeECL) wow pynsñiaw yei sñiaw khia hajrong i ma kawa ye u wan ya kiwa chong chnong neidaw wa ieh lyngkrang ka chnat ya u Transformer hajan ka Mawphlang CHC ka dong Lad Umrisain ha ka chnong Mawphlang, East Khasi Hills.
Kani ka seiñ kawa pait ya ka bha ka miat kiwa mylla sngi wei kawa pait leh ya ki kaam wa wanrah yei bha ha ka imlang sahlang, da pynsñiaw ko wa uni u Transformer ye u wanrah yei ma wa i mynsoo ya kiwa yeiñ chajan wei khamtam kiwa wan chim dawai næ kiwa wan thooh sumaar na kani ka CHC.
Ka kyrwoh khubor na uwa yahkhmat da pyntip wa ka jubab wa ki yoh ki neiliang ka chnat MeECL toh wa ka chnat em ko hei duna poisa wa khroo bha wot wow pynbha næ kyrriah ya uni u Transformer. Ka kyrwoh khubor da pynsñiaw ko yei sñiawkhia kawa khroo hajrong ini i jubab na ki sahep ka chnat.
“Ka seiñ ka kwah ko wow pyn-kynmoo biang ya ka chnat lada ym ye ki u kyrriah næ pynbha ya uni u Transformer toh u kær rap bha noh soodong yong oo khnang wa ym em i ma ya kiwa lai wa yeiñ najan khamtam ki khynnah khian”, da ong ka kyrwoh na u Rickson Nongsiej, General Secretary ka MLU Central Body.
“Dang ha kini ki sngi, uwi u masi kyrtong da chah riñ u ha i bordiñ na uni u Transformer wei man ko i ma wa khroo ya ki paidbah chong chnong lada ka chnat ym chim khia wow pait lang yei ma wa yang ya ki paidbah”, da ong uni uwa yahkhmat ka seiñ.
“Neiliang yong ka Mawphlang Labour Union da kyrpaad wei kyntu ko ya ki bor wa haneiñ ka chnat MeECL wow chim khia ya kani khnang wa ym wan jia ki jia wa sñiawsih hadien habood”, da ong u Rickson Nongsiej uwa da pynsñiaw wa kam ka seiñ em ko i sñiawkhai halor ka chong suk chong saiñ ki paidbah chong chnong.
Discussion about this post