U Montri ka chnat Puræ Puthi, u Rakkam A Sangma da pynche u yei mih khubor wa em i pynbor ya ki College wow pynyabi yow yoh tipmit na ka Captain Williamson Sangma State University, deiwa ong wa ym em mih kam ini i phah pynbor.
Da kylli u leh ha iwon i rukom wa mih kam ini heiwa wot u Montri Rangbah leh da klam che u wym em kam itæ i pynbor wow lai paan yei tipmit naka skurbah ka jylla.
Da khana u wa neiliang ka sorkar da thoh ko cha waroh ki College yow kyntu wei wow ya syllok ki lada sñiaw yahaap ki wow pynyabi noh wa kani ka State University.
U Rakkam da pynsñiaw u wa i thmu hawa wanrah ya kani ka State University toh neibynta wow pynsuk ya kiwa lai puræ neibhah wa ha ki Central University da em ki kattu katni ki kyndon kiwa emkaam wa hap wow bood wei teiñ teiñ man ki kiwa eh ya ki thaw puræ wow pynkrehkaam ya kini ki kyndon.
Da e nongmuna yeiwa jia heiwa ka sorkar da hap ko wow thoh cha ka sorkar pyrdi yow pynlait ya ka jylla na ka Common University Entrance Test (CUET).
U Montri da ong u wym bha wow phah pynlait bait man-i-por wei da hap wow thooh laad thooh luti kawa daw neh chirta.
Hawa kylli, u Rakkam da pyntip u wa ki kattu katni ki College da phah ki ya ki Application wei da pynsñiaw ki yei kwah smat ki wow pynyabi, tangwa da pynrap u wa emkaam wow hap u bood ya ki luti krehkaam neibhah wa toh kawa dang sdang wei daw chimpor wow pynbiang pynbait ya waroh kiwa emkaam.
Discussion about this post