U Montri ka chnat Social Welfare, u Paul Lyngdoh da kyntait u yei pynbaad wa da pyndam u ya ka Chairperson ka Meghalaya State Commission for Women, ka Phidalia Toi du neidaw wa mih ki khubor hamsaya.
U Paul Lyngdoh da ong u wa da dep u wow puræ ya ka Report wa bniah kawa da kdaw che wa ka Phidalia Toi ym em won ko cha ki yalang ka Committee neibhah ka tip ko wa hap ko wow em ha 4 tylli ki yalang khlem pep wei katkam ki kot ki sla (File) da pynyoo wym em wan ko cha ki chong yalang ka Committee.
Chooh chooh da ong u wa da em leh da em ka ujor pyrchah ya ka wa embynta ko ha ki kaam wa yatoh waka Election. Kamtæ da ong u wa suk bha wow pynbaad ya ka sorkar wym em leh ko iyi iyi tangwa manda leh won da chah pynbaad biang wa iyi i daw wa da leh yeiwa leh.
Hachwa ini, ka MSCW da pynmih khubor ko yei khyrngiat wa da pyndam ya ka Chairperson deiwa ong wa i pynbna da u Montri yeini hakhmat kiwa thoh khubor toh iwa da leh khlem da bood ya ki kyndon ka Meghalaya State Commission for Women Act, 2005.
U Paul Lyngdoh da ong u wa da leh ka sorkar yeini ymtoh wa tieñ ya uwon uwon namo wow pynhun ya kiwon kiwon wei daw thung da ka Committee yow thooh ya ka Chairperson kawa thymme.
Da ong u leh wa ka sorkar da chah beiñ bha ko wa jied ko da ki bru kiwa pyn da ki bru Party, kattu u thooh noh da ka bru wym em wan na kawon kawon ka Party wei kawa sñiawthooh ya ki kaam wa yatoh wa ki kynthai.
