Ym em pynkylla yei rukom thung kreh ka DSC hanla em ka Roster, 80% i kreh da booh bhah ya ki tre District: Conrad

U MLA ka Mawkyrwat, u Renikton Lyngdoh Tongkhar, ynne hapoh ka dorbar chna aiñ da wanrah u yaka phang yaklam heiyatoh wa i pynslem ka DSC wow pynman Exam yaleh kreh wei wow pynbna Result deiwa ong wa khaddooh da pynman Exam toh ha u 2017 wei em ki District leh nadooh u snem 2019 wei i daw toh wa kulmar ki sahep sorkar wow pynkhreh wei wow pynkrehkaam yaka Roster.

Da ong u leh wa yow phah yaka File na kawi ka miej cha kawi toh iwa chimpor du hapoh ka District wei yow poi ko cha ka Personnel & A.R. Department yow mynjur yaka Roster toh kawa chimpor chooh chooh.

Da kdaw u leh wa haka OM wa da pynmih da ka sorkar haka 14-06-23 da klam che ko wa hapoh ki District hawa ki kreh toh ki wym chah kyrriah namo ki Non-Transferrable Post toh u man ko 80% ya kiwa chong chnong pura ki District tangwa da em won ki kyntien wa ong wa ini toh du lada ym em ki Garo kiwa yaleh yei kreh wa lait kam ha Shillong wa Jowai wei ini toh iwa da pynkulmar chooh chooh yei yabhah yei kreh neibhah dang em kiwa sñiawthooh wa daw hap lai da ka 40:40 hapyrdi ki Khasi-Jaiñtia wa Garo.

U Montri Rangbah, u Conrad Sangma hawa pynche yeini da ong u wa ka OM wa da pynmih haka 14-06-23 toh ka jooh kawa da pynmih ha u snem 1972 khlem da pynkylla chi kyntien leh, kamtæ ymtoh u thut i thung kreh neibhah nadooh nachwa ki DSC da bood ki ya kani hi ka jooh.

Related posts

Lai ood ki MDC ka VPP ha ka sorkar wym yoh Scheme sorkar pyrdi ha ki Constituency wa em ha sor

May 13, 2025

Lada ka sorkar sñiaw ko wa emkaam palat ko wow wanrah luti rel ye ko wow lai chakhmat: Ardent

May 12, 2025

Heiyatoh won waka Roster, u Conrad da ong u wa haka 24-07-23 da pynmih yaka hukum wa ki kaam wa thung hapoh ka District da ka DSC, da e bor ya jar jiar ki DC wow pynbait yaka Roster khlem da emkaam wow phah cha ka sorkar yow smat i thung kreh.

Da pyntip u leh wa ka sorkar da phah ko wa hap wow yaleh ya kawi ka Subject dei ktien wa klam ha katu ka District yow pyntikna wa ki tre District hi wow yow ya ki kreh wa lait.

Hajrong ini waroh da ong u wa 80% i kreh u man ki ya ki tre District kamwa da jooh leh nachwa hi wei ym em iyi iyi i pynkylla wei ym em leh u thut deiwa da dep ka sorkar wow pynbait ya waroh iwa ye u pynthut deiwa e nongmuna u wa ini wa dep da em ki kreh wa dang dep thung.

Puræ leh: 80% ki kreh sorkar wa lait ha ki District u lai ki cha kiwa chong chnong ka District