Hadien wa mih khubor ynne ka sngi heiwa da pynbaad wa da thung kreh Home Guards khlem Advertisement ha East Jaiñtia Hills, neiliang u PH Shylla, u Public Relations Officer, Directorate of Civil Defence & Home Guards Meghalaya, Shillong da pynche u yeini iwa da chah pynbaad.
Da ong u wa i thung kreh ha ka chnat Civil Defence & Home Guards da leh da ka Central Recruitment Board yong ka chnat ha waroh kawi ka jylla Meghalaya, lait noh ya kiwa kreh (Ministerial Staff) ya kiwa da thung da ka District Selection Commission. Kawon kawon ka District Office ymye ko wow pynman ya i thung kreh iwa pura lait na kiwa chipor donhi (Contractual Posts on Temporary Basis).
Chooh chooh da ong wa kopsar em ki seiñbhalang kiwa da sñiawkhia wa em ki khynnah kiwa da chah hikai (Training) kam ki Home Guards Volunteers wa pynman da ka District Home Guards Training Centre ha East Jaiñtia Hills wei da sñiawthooh bakla wa ini i chah hikai toh ka Rally thung kreh. Ki Home Guards Volunteers kamwa man i pyrtuid ki man ki kam ki Volunteers ym man ki kam kiwa kreh sorkar wa pura katwa kamtæ ym em u pynman ya kawon kawon ka Rally thung kreh.
Chooh choh ka District Home Guards da pyntip ko cha ka yung krehkaam u Deputy Commissioner ka East Jaiñtia Hills wa daw pynman ya kani ka Training ya ki Home Guards Volunteer wei da yoh bor leh wow pynman ya ini.
Kamtæ da pyntip cha ki paidbah wa ki yung krehkaam ka chnat ha ki District neibynta ka Civil Defence wa khlieh da u Deputy Controller of Civil Defence wa u khlieh ka Home Guards, u District Home Guards Commandant/Officer Commanding jooh pynman ko ya i e sikai ha waroh chi snem wei ini ym mut i wa da i e sikai toh ki Rally thung kreh neibhah u man donhi ki kam ki “Volunteer”.
Chooh chooh da kyntu ya ki khynnah khynroo khyllood, ki Dorbar Chnong, skur, College wa kiwi wow lai cha ki yung krehkaam u Deputy Controller of Civil Defence for Civil Defence Training wa ka yung krehkaam u District Home Guards Commandant/Officer Commanding for Home Guards heipor wa man kreh lada kwah ki u chah hikai wow man kam ki Volunteer.
Puræ leh: Khlem Advertisement pynman thung kreh Home Guard ha East Jaiñtia
