Ym em pynyoh ka sorkar yei bhah kreh ki tre chnong ha ki yung krehkaam ka sorkar pyrdi: Ardent

U MLA ka Nongkrem, u Ardent Miller Basaiawmoit ynne hapoh ka yung dorbar chna aiñ da wanrah u yaka phang yaklam yei wym leh ka sorkar yeiwa toh u leh ko yow dawa yei hok ki jaitbru tyrne yow yoh ki bhah kreh hapoh ki yung krehkaam ka sorkar pyrdi.

Da ong u wa katkam wa da pynbna da ka Ministry of Personnel Public Grievances and Pensions da booh bhah namo ka Reservation neibynta ki SC 15%, ST 7.5 % katwa ya ki OBC won 27% kawa man kam ka All India deiwa yaleh Open Competition.

Da em leh ka Reservation ha ka Group C wa Group D heiwa da ong u wa ka Meghalaya ye ko wow yoh hadooh 45%.

Da e nongmuna u wa ha NEHU dang yoh bhah da kiwi kiwa na baar heithaw wow kreh da ki tre jylla wei kamjooh da jia leh ha NEIGRIHMS heiwa boon ki Nurse chynrang toh kiwa wan na baar jylla.

Related posts

Ki paidbah pynbor ki ya kiwa mihkhmat wow wan cha ki yalang tangwa chah khñium won lada pynemkaam Siren: Paul

November 18, 2024

Dam noh ka NPP wow kyrchaan ya ka sorkar ka Manipur wa yahkhmat da ka BJP

November 17, 2024

Kamtæ da ong u wa hawa ka sorkar e thaw ko ya kini ki yung krehkaam ka sorkar pyrdi, toh u e ki leh i myntoi cha ki paidbah ha kam kini ki por wa duna kreh khamtam kitu kiwa em hapoh ka Group C wa Group D yow lait u sepai ini wa da e bhah cha ka jylla.

U Montri Rangbah, u Conrad Sangma hawa e yei jubab da ong u wa em boon ki yung krehkaam ka sorkar pyrdi hapoh ka jylla nadooh ki thaw puræ wei kamjooh leh kiwa e kreh.

Da ong u wa katkam ki kyndon wa da booh ha ki thaw puræ ka sorkar pyrdi da booh bhah ko 7.5% ya ki ST tangwa ha ka NIIT da booh bhah 50% neibynta kiwa chong chnong ka jylla wei ha NIFT leh i jooh.

Ha B.Tech ka NIIT da em 208 ngut kiwa na Meghalaya na ki 660 ngut, ha Hotel Management hapoh ka Catering Technology & Applied Technology najrong ka 7.5% da booh bhah sa 13 tylli ki Seat ya kiwa na Meghalaya, wei ha kani ka 1^st Year Batch wa em 160 ngut ki khynnah, 57 ngut toh kiwa napoh Meghalaya iwa mut 35% iwa da heh bhah na ka 7.5% wa da booh ya ki ST.

Ha NEHU da booh bhah ko 50% neibynta ki ST ka ri, tangwa 81% kiwa lai puræ ha NEHU toh kiwa na Meghalaya. Chooh chooh 10% da e cha kiwa lai Post Graduate kiwa pyndep yei puræ na ki College wa da tipmit da ka NEHU kamjooh kiwa chong chnong ka Meghalaya.

Ha NEIGRIHMS da booh bhah ko 14 tylli Seat yaka Meghalaya neibynta kiwa lai puræ na ki 50 tylli ki Seat kiwa lai puræ MBBS.

U Conrad da pyntip u leh wa heiyatoh wa kiwa yaleh kreh ha ki thaw ka sorkar pyrdi da leh katkam ki kyndon ka sorkar pyrdi, heiwa ha ka Group A wa Group B Post ya ki ST da booh bhah 7.5% wa 44% cha ki ST hapoh ki Group C wa Group D.

Da ong u wa ha NIIT Shillong da em 40 ngut kiwa kreh hapoh ka Group C kiwa na Meghalaya na ki 49 tylli ki kreh.

Kamtæ u Conrad leh mynjur u wa manda booh yung krehkaam ka sorkar pyrdi hapoh ka jylla, ki khynroo khyllood ka jylla toh u yoh ki yei myntoi tangwa hap wow bood ya ki kyndon wei lada em ki laad wow yoh chiboon i bhah, ka sorkar u leh ko yeiwa emkaam.

Kiwi de kiwa da chimbynta u yaklam hajrong kani ka phang toh u MLA ka Amlarem, u Lahkmen Rymbui, u MLA ka Shella, u Balajied Kupar Synrem, u MLA ka Mawryngkneng, u Heaving Stone Kharpran wa u MLA ka Mylliem, u Ronnie V Lyngdoh.