U MLA ka Mawlai, u Brightstarwell Marbniang, ynne hapoh ka yung dorbar da wanrah u ya ka phang yaklam hajrong iwa ong u Montri sorkar, u Kyrmen Shylla wow e laad ya ki paaid Jaiñtia wow rai ki hajrong ka luti rel khlem da luchia kiwa na baar.
U Brightstar da ong u wa ka VPP ym em pyrchah ko ya kawon kawon ka kaam pynroi kamjooh ka luti rel wei sñiawthooh ki yei emkaam wow em ka rel wa kit mar ha kani ka thaaiñ ka ri tangwa ym em ware kyrchaan yei wanrah ya ka rel wa kit bru.
Da ong u wa yeini waroh ye u leh deiwa em ki laad yada yow lait u psiah laitlan kiwa na baar neibhah pynkattæ leh da em bha boon kiwa psiah pychah aiñ chapoh ka jylla. Deiwa ong leh wa kiwa boon ki bru ha Khasi wa Jaiñtia Hills dang boon kiwa artatien yei wan ka luti rel heiwa ha kiwi ki jylla ka North East wa em luti rel kam ka Nagaland wa Mizoram em ki ya ka ILP wei hapoh ka jylla i leh emkaam i ya ka ILP.
Heiyatoh wa iwa ong u Kyrmen Shylla, da kylli u wa iyi mut u hawa ong u kiwa na baar neibhah da yoo lakam wow pynpra ya ka jaitbru kiwa man iwi donhi kitæ ki Khynriam, u Pnar, u Bhoi, u War, u Maram, u Lyngam toh kawi donhi ka jaitbru.
Da pynche u leh wa waroh emkaam i yei roi i paar tangwa ymtoh wow ktah ko ya ka jaitbru hadooh wa daw kylla ka imlang sahlang deiwa wan kiwa na baar.
U Ardent Basaiawmoit won da ong u wa ini i rukom klam u Kyrmen toh iwa kwah wow pynyaphær ya ka jaitbru yong i wei toh u beiñ yeini tangwa ye u man leh wa toh klam bakla u Kyrmen.
U Renikton Lyngdoh Tongkhar uwa man kam u MLA ka UDP, da ong u wa toh u chim yeiwa klam u Kyrmen kam u bru samen wei ymtoh neibynta kawon kawon ka seiñ saiñhima neibhah da klam u khlem da ya chong pyrkhatlang wa ki dkhot wa kiwa yahkhmat ka Party.
Neiliang u Lahkmen Rymbui uwa man leh kam u MLA ka UDP, da ong u wa ha Garo Hills ki paidbah da pdiang ki ya ka luti rel ha Mendipathar wei da em leh i dawa na ki MLA wow pynjrong ya ka luti rel cha South Garo Hills. Kamtæ ki paaid ka Jaiñtia Hills leh toh u yoh laad ki wow pynsñiaw yei sur ki wa iyi kwah ki wei lada ong ki wa kwah luti rel toh u chah ym ye u khang neibhah kani ka toh ka synchaar paidbah wei ym ye wow ong hi-eh wa pyrchah ki paidbah.
Kamtæ da ong u wa lada wan ka tyrwa wow wanrah luti rel ha Jaiñtia Hills toh u e laad ya ki paidbah wow rai ki wei lada kwah toh u e wei lada ym kwah ym ye u leh iyi iyi.
U MLA ka Mowkaiaw, u Nujorki Sungoh da ong u wa ka Party UDP da rai ko wow lai katkam i sur ki paidbah ymtoh katkam iwa kwah ka Party. Wei ka UDP leh kwah hi ko ya ka luti rel neibynta ka rel wa kit mar lada biang ki laad yada.
Neiliang won u Adelbert Nongrum da dawa u wow paan maap u Kyrmen ya itæ iwa ong u ki bru wa na baar.
U Montri Rangbah, u Conrad Sangma da ong u wa ym leh iyi iyi khlem da yoh i mynjur na ki paidbah wei da khut u leh wow yachong yaklamlang yow klam yei daw wa pyrchah neibhah da sñiawthooh wym em pyrchah luti rel tangwa pyrchah yei wan psiah ki bru kiwa na baar.
Kamtæ da ong u wa daw khut pynman Meeting yow ye u yaklam wei ya pynbait yeini waroh yow tip kammon wow lai chakhmat neibhah kani toh kawa emkaam bha neibynta ka khayi pateiñ khamtam ha ini i por wa ka sorkar pyrdi kwah ko wow wanrah luti rel cha waroh ki nongbah ka jylla wei ym tip de mynnu u yoh laad biang kam kani.
Discussion about this post