Kiwa sikai skur SSA da kyntait ki yei ong u Montri Rangbah ka jylla, u Conrad Sangma wa ka sorkar jylla ym emkti ko wow pynman wakreh sorkar wa pura ya kiwa sikai.
Hawa yaklam wa kiwa pathai khubor, u President ka Meghalaya SSA Teachers’ Association, u Aristotle Rymbai da ong u wa katkam ki kyndon ka Samagra Shiksha Abhiyan hapoh ka Paragraph 5, man ko i kaamram ka sorkar wow thung kreh ya kiwa sikai heiwa ka sorkar pyrdi daw yarap poisa ko. Katkam ka Para 4 ki kyndon, da ong wa kiwa sikai toh u thung kreh katkam ki kyndon ka sorkar jylla.
“U Montri Rangbah da kwah u wow kyrriah yei kitkhlieh cha ka sorkar pyrdi. I kyrpaad i ya u Montri Rangbah wa chwa wow ong ya kam kini ki kyntien wow puræ bniah ya ki kyndon. Toh leh u wanrah u ya ki sabut wa biang chwa wow chim u ya kam kani ka luti”, da ong u Rymbai.
Heiyatoh waka tulop, u Rymbai da pdiang u wa 90% toh kawa e naka sorkar pyrdi katwa ka 10% toh naka jylla, da kdaw u leh wa ka sorkar jylla ym pu em u e ko yei bhah kattu la 3 snem.
Ka sorkar jylla da booh ko ya ka tulop wa T. 15,000 ya kiwa sikai Lower Primary School wa T. 20,000 neibynta kiwa sikai Upper Primary School wei najrong ini da em leh sa i bhah yong ka sorkar jylla.
Kamtæ sa i bhah yong ka sorkar jylla, ka tulop kiwa sikai Lower Primary toh u man ko T. 19,044 katwa kiwa yong ki Upper Primary School won T. 24,493.
U Rymbai da kdaw u leh wa ka jylla ym pu em pynlait ko yei bhah yong ka kawa T. 104 klur la 3 snem.
“Ka sorkar pyrdi da pynlait ko T. 59 klur neibynta ka tulop wa ar bnai wei lada ka sorkar pynlait ko yei bhah yong ka, ki bnai wa dang sah leh da yoh lang”, da ong u Rymbai.
Da ong u leh wa katkam i rai ka Central Cabinet Committee, da pynkylla ya ka kaam poisa poilaiñ neibynta 5 snem hadooh u 2026 wei katkam ini, da e da chisien e da ka Lump Sum Grant da ka sorkar pyrdi katwa iwa sah toh iwa daw pynlait da ka sorkar jylla.
U Rymbai da pynkynmoo u leh ya u Conrad Sangma wa lait na ka Meghalaya ,waroh kiwi ki jylla ka thaaiñ Northeast da su ki ya kiwa sikai SSA lyngba ka poisa wa da mang da ka sorkar jylla heiwa u Conrad da ong u wa kiwi ki jylla ka Northeast leh ym em su ki ya kiwa sikai SSA.
Heiyatoh wa i pynman ya ki tamasa, u Rymbai da ong u wa ka puræ puthi ym toh kawa em hakhmat wei ka sorkar ka-it ko du wow pynman tamasa.
