Heiyatoh i yap uwa uiñke suwari uwa na ka ri Hungary uwa tip kam u Puskas Zsolt, heiwa yei metyap u da chem ha ka 10 tarik uni u bnai, ym em i suba wa pynyap oo wei da yap u neidaw wa oor u heipor wa lai kjat u ha ini i thaw wa man riat.
Katkam ki dak ki chin wei deiwa takit nyngkong da chem boon ki kha wa pynyoo wa haap u neithaw wa jrong.
Da chem leh ya ki kot ki sla nei metyap kiwa da ye wow pyntikna wa toh u Puskas Zsolt.
Neiliang u Symbood Montri Rangbah uwa pait leh ya ki kaam pohyung ka jylla, u Prestone Tynsong leh da pyntikna u yeini wym em wa leh chynnam tæ jia ini wei yei metyap da chem na chnong Ramdait iwa em ha luti wow lai cha Tyrna wa em ha thaaiñ Shella hapoh ka Sohra Civil Sub-Division.
U Prestone da pynsñiaw u leh yei sñiawsih wa jia ini deiwa kyntu ya kiwa uiñke suwari kiwa wan chapoh ka jylla wow man ki kiwa syndong hawa lai ki cheiwon cheiwon khamtam cha ki wah neibhah wa man ki kiwa khlanbor hawa nujor cha kiwi ki bynta ka ri wa man madan.
Hanla i metyap da man i iwa da pyut, neiliang ki pulit leh da ong ki wym yoodur wa em wa emkti wow pynyap ya uni u bru tangwa kattæ leh dang hap yang ya ka Post-Mortem Report.
Sa iwi leh waroh ki tiar ki tar hadooh ka poisa deilang ka Mobile Phone toh kiwa dang em wei ym em wa tooh ki.
Yei metyap u Zsolt daw wan chimkti da kiwa ha-yung ha-sem u iwa da booh ha Civil Hospital, Shillong.
Discussion about this post