Ym em tyngkheiñ ka MRSSA wa ki Entry Point yaka riti synchaar ka ri: HNYF

Ka Hynñiewtrep National Youth Front (HNYF) da ong ko wa ha kini ki por wa da em ki dawa wow em ki aiñ wow pait yei wan psiah pyrchah yaka aiñ chapoh ka jylla i wym toh leh iwa thymme heiwa da wanrah yaka aiñ MRSSA kamjooh wow booh yaki Entry wa Exit Point kamjooh da dawa wow pynkrehkaam yaka Inner Line Permit hapoh ka jylla Meghalaya, da em wa pynthut ya ini deiwa yaleh daka mukotduma PIL.

Ka seiñ da ong ko wa kani ka PIL da ong ko wa ka MRSSA wa waroh ki Entry Exit Point man ki pyrchah yaka Article 14,15,19 wa 21 ka riti synchaar (Constitution) ka ri kiwa e yei hok Fundamental Rights ki tre ri tangwa ka seiñ da ong ko wa ki jylla ye ki wow chna aiñ deiwa biang ki daw heiyatoh wa kini ki hok.

Ki daw wa da e hajrong ka Article 14 kawa ong wa waroh toh u man ki kiwa salonsar hakhmat ka aiñ, toh iwa bakla neibhah ka MRSSA, ki Entry Exit Point toh kiwa pait donhi yow pyntikna ya kitu kiwa man kam ki tre ri neidaw wa ka Meghalaya em ko u pood wa jrong waka Bangladesh.

Sa kawi ka yurim ka PIL toh wa ka MRSSA wa ki Entry Exit Point man ki kiwa pyrchah yaka Article 15 ka Constitution kawa khang yei chah leh chilliang deiwa pait yaka niam, jaitbru, i thaw wa kha yow khanglaad yaki wow yoh ki yei hok yong ki. Tangwa ka seiñ da ong ko wa ka MRSSA ym em ko kam kini ki kyndon pyrchah ya ki tre ri tangwa da pynman kaam ya kani ka aiñ yow yada ya ki jaitbru ri-loom.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Ka PIL da ong ko leh wa ka MRSSA wa ki Entry Exit Point man ki leh pyrchah yaka Article 19 ka riti synchaar ka ri kawa e hok ya kiwon kiwon wow lai u wan wei wow sah ki ha iwon iwon i thaw ka ri kiwa man kam ki tre ri tangwa ka seiñ da ong ko wa ini ym em mut ko ya kitu kiwa psiah chapoh ka ri pyrchah yaka aiñ.

Heiyatoh won waka Article 21, da ong wa ka jylla ym em pyndooh ko yei hok man laitlooid lane pyndooh ko yei hok wow im.

Kani ka PIL da pynbaad ko leh yaka sorkar Meghalaya wa da lai palatpood ko hawa pynkrehkaam yaka MRSSA wa ya ki Entry wa Exit Point deiwa ong leh wa yow pait yei psiah pyrchah yaka aiñ ye wow leh deiwa pynkrehkaam yaka Section 144 ka CrPC wa Section 188 ka IPC, iwa daw man pathan ko kamwa pyndooh yei hok man laitlooid ki bru neibhah ye ki wow chah khut, chah hajar heipor synyaw leh.

Kamtæ ka HNYF da ong ko wa ki jiatbru tre ri ka jylla emkaam ki yaki aiñ wow yada yaki kamjooh yei long i  man yong ki.