Kiwa chong chnong ka Hingaria, Huroi, Lahalein wa Lejri hapoh ka lama ka Joint Action Committee da pynsñiaw ko yei sñiawsih wa joor yei leh chilliang ka North Eastern Council (NEC) heiyatoh wow chna ya u sarok hapoh ka NERSDS neibynta ki bru wa sah cha jngai na sor.
I pynkhreh yow chna ya u sarok namo ka Detailed Project Report (DPR) neibynta u Sonapur-Borkhat Road hapoh ka NERSDS toh kawa da dep e nadooh u snem 2008-09 wei toh kawa da dep mynjur wei kawa da phah leh cha ka DoNER Ministry yow yoh yei mynjur tangwa hadooh katni ym pu em yoh ko yei mynjur na ki daw wa tip du da ka NEC waka MDONER.
Ka sorkar jylla ha ka chithi wa da thoh ha ka 03-03-2021 da u Chief Secretary ka jylla Meghalaya, da chim ki ya ka kitkhlieh wow pyndap ya ka poisa wa sah kawa T. 88.33 klur (Phase-II) wei wow pyndep ya waroh i kreh lada ym pteiñ de ya ka NERSDS hapoh ka 15th Finance Commission. Ha kani ka chithi da kyrpaad leh ya ka NEC wow pyrkhat pynlait ya ka poisa wa T. 62.20 klur neibynta ka bhah wa nyngkong namo ka First Phase ini i kreh ya uni u sarok. Heiwa ya ini leh da tip da ka Meghalaya High Court ha ka hukum wa da pynmih ha ka 20-04-2021.
Tangwa hadien wa ka sorkar da chim ko yei bahkhlieh leh, ka NEC ym em tyrwa ko ya ka sarok Sonapur-Borkhat yow yoh yei mynjur na ka DONER heiwa heithaw uni u sarok, ka NEC da tyrwa pathan ko ya i kreh hapoh ka jylla Nagaland heiwa ya ka DPR toh kawa da e ha ka 30-12-20 kawa da yoh yei mynjur na ka DONER ha u Wisu (March), 2021. Katwa ya u sarok Sonapur-Borkhat uwa emkaam bha ki bru uwa da ktah yei im-ja wa i yap im ki bru tangwa da chah kyntait u hanla i dawa wow yoh ya uni u sarok toh iwa da slem bha.
Ka NEC katkam ka yutip wa da yoh da phah biang ko ya ka DPR neibynta u sarok Sonapur-Borkhat ha ka 04-05-21 yow pyrkhat biang ka IMC manda ka NERSDS da yoh ko yei mynjur na ka 15th Finance Commission, tangwa hadooh kattæ ym pu em lai ini chakhmat.
Hajrong ini da kylli na ka sorkar wa sa katwon tylli ki mynsien u dooh chwa wow yoh yei mynjur wow chna ya uni u sarok, heiwa ki paidbah da yoh ki du ki kular wa chukor hanla da dep wow pynman ya kiwa boon ki yakhih hadooh ha Khliehriat ini wa dep.
Ki paidbah da kyrpaad ki sa chisien ya ka sorkar Meghalaya, NEC wa DONER yow pyntikna wa uni u sarok wa da sahkut da slem u yoh u yei mynjur smat deiwa khlem pyrkhat ya ka Politics wei lada pynslem biang, daw wanrah ko yei yakhih da ki paidbah ki chong khappood hadooh wow lai yakhih hakhma ka Meghalaya Secretariat waka NEC.
Ka Wyrta na u Raja L Suchen, Secretary chnong Huroi waka Joint Action Committe ka Dorbar Chnong Hingaria, Huroi, Lahalein wa Lejri.
Puræ leh: Da dep phah lut ka sorkar cha ka DoNER yow chna noh ya u sarok khappood Bangladesh: Prestone
