Hadien wa sdang i yakhih wa khlem booh por ka Jaiñtia Hills Truck Owners Association (JHTOA) kawa da sdang nadooh ka 6 tarik, ynne ka sngi u DC ka East Jaiñtia Hills, u SS Syiemlieh da khut u ya ka yalang waka seiñ ki karkhana pynmih khyndaw-bilat hapoh ka lama ka All Jaiñtia Hills Cement Manufacturers Association (AJCMA) ha Conference Hall ka yung krehkaam yong oo.
Ha kani ka yalang da wan chimbynta ki heh yong ki karkhana pynmih khyndaw-bilat waphær waphær na Ri-loom Jaiñtia.
Hadien ka yalang hawa yaklam wa u President ka AJCMA u RK Pareek da ong u wa lada pteiñ i yakhih neiliang ki karkhana ym yohsa de ki tangwa daw hap khang noh ki.
U Pawan Joshi, u Secretary ka AJCMA da ong u wa kamwa u Montri Rangbahdooh ka ri u Narendra Modi da kwah u wow pynroi ya ki jylla ka thaaiñ mihsngi, da em boon bha ki Project kiwa da kreh tangwa nei sangeh i kit khyndaw-bilat da chah ktah bha kini ki kreh wei wot ki kreh ha ka jylla leh da chah ktah bha ki.
U President ka JHTOA, u Nidamon Chulet da ong u wa ym em u mih iwon iwon na ka yalang wei ka seiñ da yieñ skem ko ha ka yurim wa lada ym yoh yeiwa dawa ka seiñ u pteiñ hi ko ya i yakhih.
Chooh chooh da pyntip u wa mynstep ka sngi daw chong pyrkhat biang ka seiñ wa ki karkhana chwa wow chim ya ka rai wa khaddooh.
