U Symbood Montri Rangbah ka jylla, u Prestone Tynsong da khana u wa ha jylla Meghalaya ym pu em kitæ ki bru kiwa na kiwi ki ri kiwa wan pynpsiah pyrtuid (Apply) wow man kam kiwa chong chnong wa pura yong ka ri India, lyngba ka Citizenship Amendment Act (CAA).
Kam wow pynkynmoo wa u Montri Kaam Pohyung ka ri India, u Amit Shah dang ini wadep da pynbna u wa ka sorkar pyrdi daw pynkrehkaam pura noh ko ya ka CAA mar ya kut ka khlam COVID-19.
Hawa kylli ynne ka sngi, u Symbood Montri Rangbah da ong u wa ya ka CAA dadep wow pynkrehkaam, tangwa ya ka jylla Meghalaya da pynlait ha ki thaw wa haap hapoh ka Sixth Schedule, katwa ya ki thaw wa em kamwa 3% kiwa toh ki ‘European ward’ i yaklam dang lai i chakhmat wei da phah leh yei thoh wow pynlait nei pynkrehkaam ya ka CAA.
