Ki Home Guard Volunteers da thoh ki cha ka KSU Jaiñtia Hills District Unit yow paan yarap neidaw wa ym em yoh ki yaka nongsngi la 5 bnai iwa da poi hadooh 186 sngi kiwa da kreh ki neibynta u COVID-19.
Da pyntip ki wa ka nongsngi yong ki toh kawa dang sah kawa nadooh ka 27-03-20 hadooh ka 28-09-2020 wei da dep su yaka nongsngi wa 40 sngi tangwa hadooh katni ym em de yoh ki wei ini da booh ko yaki hei eh heiwa tang yaka bai yung leh ym ye de ki wow su.
Ka seiñ KSU-JHDU da dawa joor ko na ki bor wa toh u pait wow su noh yaka nongsngi khamtam ha kam kini ki por wa duna i khih i khan yow ye ki wow pyndap yeiwa emkaam ha yung ha sem deiwa pyrkhat leh ya kini ki bru kiwa da pynlut yei bor, yei buit wei da e ki doh wa mynsien wow yakhun pyrchah yow yada yaki paidbah nei poor uni u khñiang COVID-19.
Ka seiñ da pyntip ko leh wa daw lai yachem ko wa ki bor ka Home Guard West Jaiñtia Hills District Jowai wei wow booh da i thoh wow dawa wa toh u su ya waroh katai ka bai nongsngi.
