Ka mukotduma PIL wa yaleh da ka Synjuk Ki Waheh Chnong Jowai heiyatoh wa i jhep ha chnong Jowai, da chong bichaar biang ka ynne ka sngi heiwa neiliang ka synjuk da ong ko deiwi katwa ka Jowai Municipal Board (JMB) won da ong ko da iwi yei rukom wan kit jhep.
Ka JMB da ban bait ko hajrong i jubab wa da dep e ko heiyatoh i rukom pynbait lai kit jhep iwa le sien chi tayaaw deiwa da lai kit ya ki jhep wa pyut wa ki wym pyut heiwa da booh leh yei thaw wow pynyieñ kari kamjooh ki kari wow lai kit jhep heiwa da pynyoo leh yei dur wa leh yeini tangwa ka yung bichaar da ong ko wa kini ki dur ye wow chon ha iwon iwon i por wei ym ye u chaniah.
Neiliang ka synjuk da e jubab ko wa ymem won kit jhep wei ymem hi leh bood yeiwa da booh sngi wei lada wan kit jhep leh toh iwa da leh chisien arsien donhi chi bnai. Wei da em i wan kit jhep deiwa rap tista ha u Wisu (Mar) tangwa ha u bnai wa boon won em ki thaw ki wym em wan tang chisien leh.
Neiliang ka sorkar deilang waka JMB da kyntait ki ya ini deiwa ong wa da dep chna ya kawi ka WhatsApp Group wa emlang da waroh ki waheh chnong wa ki bru ka Municipal yow pyntip ki lada ymem wan kit jhep wei ym jooh em yoh ujor wym em wan kit jhep.
Heijooh i por ka JMB da ong ko wa em hi i thut wow lai kit jhep tangwa ymtoh won dei wym em bood katkam ki sngi wa da pynbait, chooh chooh da ong wa da dep khut ya ka yalang yong waroh ki waheh chnong yow yaklam yei rukom kit yei jhep wa kynthup ya kiwa pyut wa ki wym pyut tangwa da wan du arngut ki waheh chnong cha kani ka yalang hanla da dep pyntip cha waroh.
Kamtæ ka yung bichaar da ong ko wa ka sorkar toh u pynman ko ya ka yalang hapyrdi ki waheh chnong ka chnong Jowai wa kiwa mihkhmat ka Municipal Board wei toh u phah leh ya u DC wow pyntikna wa ka Municipal bood ko ya ki sngi wa da pynbait yow lai kit jhep.
Da phah leh wow thung bru u DC yow lai pait khlem da pynbna wa leh ka Municipal namo ymem yeini.
Ya ka Municipal da phah leh wow pynbait tarik ko yow yachem wa ki waheh chnong yow pynbait ya ini i wym sñiawthooh yumut.
