U Monlang Nongtdu uwa man kam u President ka Niaw Wasa United da pynsñiaw yei sñiaw diaw wym em yoh yarap na ka JHADC wa kamjooh naka sorkar jylla heini i lai mihkhmat ka Niaw Wasa ya ka jylla ha ka lympung Futsal ha Delhi ka wow sdang naka 5 tarik u Khonchonglad (Nov), 2021.
Da ong u wa u CEM ka JHADC ym yoh tang u yachem leh, wei ym phær lada ym yoh yarap leh ma dei e u tang dei por kattu katni yow yoh u pynsñiawthooh hadien wa chong yang dei yong kynta wei ini da pynsñiawsih ko wa kat da u CEM hapoh Ri-loom Jaiñtia wa ya ki kam ka liang yalehke kawa napoh Ri-loom Jaiñtia leh ym yoh u yachem.
Neiliang u Monlang da ong u wa oo kam u bru uwa da dep ngam ha ka dih ka baam kwah u wow yarap ya kiwi deiwa em ki ha ka yalehke Sports iwa ye wow pynyait ya ki na waroh ki kaam wa sih.
Neiliang ka sorkar da ong u leh wym pu em yoh yarap heiwa neiliang yong ki da phah ki ya ki kot ki sla yow paan yarap naka tangwa hadooh katni ym pu em yoh yarap wei dang artatien u wow yoh yarap.
Da e khublei u leh ya ka WJDSA kawa da e yarap ya ka Niaw Wasa ynne ka sngi kawa da e T. 40,000.
Da ong u leh wa da paan yarap na ka Meghalaya Football Association khamtam hawa mihkhmat ya ka jylla kawa ym pu em e yarap tangwa da kyrmen u boi daw e yarap won ko hadien.
Da kdaw u leh wa ka Niaw Wasa ym toh ka Club kawa mahajon wei da yoh yarap boon ki por pyn da ki bru wa kyrchaan wa maya ya ka Club neibhah ka Niaw Wasa da pynku ko ya kiwa boon ki khynnah ka Ri-loom Jaiñtia nadooh ki U-12, U-14, U-16, ki U-18 hadooh ki Senior heiwa da dep man ko leh kam ka State Champion ha ka Meghalaya State League ha u 2017 wei ini wa dep da man ko kam ka Champion ka Futsal League hapoh ka jylla.
Kamtæ da kyrpaad u ya ki paidbah wow ya ksohkti lang waka Niaw Wasa heiwa da pyntip u wa na East Jaiñtia da yoh yarap ki neiliang u MLA ka Khliehriat u Kyrmen Shylla, u DC ka East Jaiñtia Hills deilang wa ki pulit ka East wa West Jaiñtia Hills leh da e ki yei kyrchaan.
