Ka sorkar Assam ynnin ka sngi da pynbna ko wa ym emkaam wow yoh Trade License hawa sdang khih ha ki thaw wa pait da ka dorbar chnong namo ka Panchayat.
Neiliang u Montri Rangbah ka Assam, u Himanta Biswa Sarma da ong u wa ka sorkar jylla u pynsuk ko yeiwa hap u leh yow sdang khih kiwa khian khamtam ha ki thaaiñ palatsor.
U Sarma da ong u wa ka sorkar da yaleh ko wow pynkylla yei rukom pyrkhat ki bru wa hap wow su cha ki khlieh ka chnong yow yoh ya ka Trade License Certificate yow ye u sdang khih.
Kamtæ yow pynstiñ leh ya kiwa boon ki chnat wei yow lait leh u chem chitom ki bru, ka sorkar da booh noh ko cha rood yei emkaam wow yoh chwa ya ka Trade License.
Ini da mut wa nadooh ynne ka sngi uwon uwon uwa kwah wow seiñ khih hapoh ki thaw wa pait da ka Panchayat lait noh ki dukan dai kiad, ki thaw chong dih kiad wa kiwi wa emkaam Liquor License ym emkaam dei ya ka Trade License.
Ya ki dukan wa yatoh wa i kiad emkaam ki du wow yoh bor donhi.
U Sarma da kdaw u leh yeiwa klam u Prime Minister Narendra Modi yei emkaam wow pynduna yeiwa hap u leh yow sdang khih. Tangwa u Sarma da ong u wa deiwa leh yeini ye wow em kiwa poi cha wa lait tangwa ym mut won wa i chim kabu yong ki kattu katni u ktah ko ya 98% kiwi ki bru.
Chooh chooh da ong u wa iwon iwon iwa eh ye wow pynbha pynmiat deiwa em ki bru wa biang hapoh ka Panchayat waka Municipal.
Hapoh ka Assam da em kamwa 2200 tylli ki Panchayat.
