Jowai: U Deputy Commissioner, Supply, West Jaiñtia Hills da pyntip u wa ka Ministry of Consumer Affairs, Food and Public Distribution wa ka sorkar jylla, lyngba ka National Food Security Act, 2013, Reforms in Targeted Public Distribution System Chapter V Section 12. (2)(c), da pynman kyrpang wym hoi u dam u em (Compulsory) ya u Aadhaar hei wow pynsakhiat ya kiwa yoh myntoi kiwa em hapoh ka Public Distribution System (PDS).
Kamtæ hawa yatoh wa ini, u DC da pyntip u wa ki khlieh ki manyung kiwa em ya ka Card AAY lane PHH kiwa yoh myntoi na ki Scheme kiwa haap hapoh ka PDS, wa ki toh u yoh ki ya u Aadhaar neibhah daw pynkrehkaam noh ya ki kor ePos Machine lyngba ki dukan saam maar rachon.
Ini man ko leh yow pynkhooid ya i saam rachon kamjooh wow wailaad yei pynkrehkaam yaka “One Nation One Ration Card” ha ka jylla yong i wa ka ri India waroh kawi. Ka One Nation One Ration Card toh yow ye u pynemkaam yaka card rachon lada em ha kiwon kiwon ki jylla wa ki chnong yow yoh yei hok.
Yow yoh ya u Aadhaar Card, ki paidbah toh u pynpsiah pyrtuid ki lyngba ka yung krehkaam yong u Deputy Commissioner, West Jaiñtia Hills District, Jowai lane lyngba ki yung krehkaam ki Block Development Officer kiwa haap hapoh ka West Jaiñtia Hills District ha kiwon kiwon ki sngi wa man kreh.
Neidaw wa em ka khlam COVID-19 ha ka jylla kamjooh wow yada, u DC da phah u ya ki paidbah wow bood ya ki kyndon kiwa da phah ka chnat ki chait i khiah ha i por wa lai pynpsiah pyrtuid.
