U Wailadmiki Shylla, MLA ka Jowai uwa man leh u Chairman ka Meghalaya Urban Development Authority (MUDA), ha ka 23 tarik uni u bnai da saam Certificate u deilang ki tiar wa kynthup ya ka Grinder Machine wa Drill Machine cha ki 30 ngut kiwa da pyndep yei chah sikai hei sap kreh Mistri namo ka Rural Masonry hapoh ka Skills Meghalaya ha ka yalang wa da pynman ha Thomas Jones Synod College Jowai.
Ya kini ki 30 ngut da e sikai da ka Jaiñtia Institute of Technology kamwa le bnai dei kyrchaan poisa ka Meghalaya State Skill Development Society wei kattu da ye ki u chna ya ki yung neibynta kiwa dooh hapoh ka Scheme PMAY, hapoh i pait i yoo ka District Skills Committee yong ka West Jaiñtia Hills District.
Ya kani ka yalang e Certificate deilang i saam tiar da pynlai da u Eladmiki Suting deiwa emlang leh u Director ka JIT Jowai, u B. Marwein neitæ u L. Suchen, Skills Development Officer ka MSSDS Jowai, ka Dr. Iaraplang Dkhar, Principal Thomas Jones Synod College Jowai wa kiwi.
U Wailadmiki Shylla hawa e yei klam da kyntu u ya ki khon khynroo khyllood wym em khih em khan wow mih ki chakhmat yow pynpliah yei sap yong ki hapoh ka Skills Meghalaya kawa da wanrah kyrpang da ka sorkar yow lait nei dooh khih dooh kreh.
Kyntu u leh wym hoi u sarom ya kawon kawon ka jait khih khnang yow lait ki baar jylla u wan kreh cha ka thaaiñ yong i.
Pyntip haroh u kamwa man katni ki Scheme wa boon dooh mang ka sorkar toh neibynta ki khynroo khyllood khnang yow chngaaiñ ka mynried yong ki wei yow lait leh ka imlang sahlang na ki sih wa boonjait.
Da kdaw u ya kiwa da sdang ka sorkar kam ka Skills Meghalaya, CM Elevate, ka Yess Meghalaya, Meghalaya Grassroots Music Project, ka Aspire Meghalaya, ka Prime Meghalaya wa kiwi kiwi wa kynthup leh ya ki jait yalehke Sports.
Kamtæ kyntu u wym hoi u kmen hi-eh wa yoh yei chah sikai wa mynkna, tangwa chwa u lai chah sikai pait chwa ya idæ ha kayi ka sap em phi te jied wow pynpliah yeitæ khnang wa manda dep u man sakhiat kawa e myntoi.
Discussion about this post