Shillong: Ka President ka Civil Society Women’s Organisation, ka Agnes Kharshiing da ong ko wa toh u e kti ya ka takit ha ka Central Bureau of Investigation (CBI) hajrong iwa jia ya ka wa ka lok ko ka Amita Sangma ha 8 tarik u Khonchonglad ha chnong Shohshrieh, East Jaiñtia Hills.
Hawa yaklam wa kiwa pathai khubor ynne ka sngi hadien i takit yong u Investigating Officer (IO), u Gilbert Marshilong, ka Agnes da pyntip ko wa uni u heh pulit da ong u wa thooh ya ki bru wa emkti man ko kawa lai cha khmat wei katni ki pulit da thooh ki sa ya u Kynsai War uwa suba wa emkti wow pynmynsoo ya ka.
Da ong ko leh wa da sñiaw ko yei pyrchang wow phet rieh yong ki tu ki bru wei wow kyrriah kaam ya ki pulit kiwa kreh hok ya i kaam, tangwa ka Meghalaya High Court da booddien ko ya ini i kaam.
Da ong ko wa ki bru kiwa emkti wow tba kti ka ha ka 8 tarik u bnai wa dadep toh kiwa emlang wa ki seiñ saiñ pyrthai kiwa em ha ka sorkar, tangwa kattæ kyrmen ko wa kiwa em hei bor næ ki party ym tuklar ki ya ka takit wei da phah ko ya u IO wow kem bait ya kiwa tuklar.
Da pynsñiaw ko leh yei sñiawsih wa hadooh katni ka NPP ym em beh seiñ næ leh iwon iwon ya ki bru ka seiñ kam ya u Nidamon Chullet deiwa pynrap wa ini pynyoo wa ki bru wa ha i bor waroh man ki kamjooh wa i kreh hok ym em i neibhah yada ki ya ki bru wa leh ya ki kaam wa sih.
Ka President ka CSWO da pyntip ko wa u Kynsai da maham u hakhmat kiwi ki bru kiwa pyntip cha ka nadooh u snem wa dadep wa kem ko ya ki Truck kit mooyong pyrchah aiñ ki yong oo, da pyntip ko wa ha kitu ki por da phone u cha ka tangwa ym bien ko u yaklam wa oo hadooh wa da pyrchang u yaklam wa ka lyngba uwi u pulit.
Chooh chooh da pyntip ko wa ha i por wa yoh kem ya ki tai ki truck da chem leh wa ym em ki ya ka Challan wei ya ka Challan da thied na Mookyndur katwa i pyrtuid won da dei yong ki Garo, kamtæ ka Agnes da ong ko wa ini i leh da che wa em i tooh iwa napoh kawa da pynman ya ka jylla wow dooh nong khamtam ha kani ka por wa duna poisa ka sorkar.
Ha i jooh i por da pynsñiaw ko wa ym hun ko ya i thung ka sorkar da ka takit wa laitlooid namo ka Independent Enquiry deiwa ong leh wa man ko i pynlut sepai ya i por wa ka poisa.
Discussion about this post