Ym hun ka CoMSO yeiwa daw pynkylla ya ka 6th Schedule

Ka CoMSO da pynsñiaw ko yei wym hun wa i pyrchah joor hajrong ka khubor wow tip wa ka Parliamentary Standing Committee (PSC) wym em pdiang ko yei e yumut yong ki ADC, ka sorkar jylla, ki dorbar tre ri wa ki kynhun seiñbhalang waphær waphær yong ka jylla hawa yatoh wa i tyrwa wow pynkylla (Amendment) ya ka Sixth Schedule yong ka Riti Synchaar ka ri India yow yahaap ki katkam i man i long ka synchaar khadar tre ri hapoh ka jylla.

Iwi na iwa dawa wei da e yumut iwa hakhmat dooh najrong kiwi man ko wa ha ka Paragraph 12 A(b) yong ka 6^th Schedule toh wow pyndooh ya i kyntien ‘President’ wei wow thap noh da i kyntien ‘Governor’ khnang wa lada em kiwon kiwon ki aiñ yong ka sorkar pyrdi ki wym yahap wa ka riti dustur næ ka rukom synchaar khadar yong ki tre ri, i bor wow pyndam lane wow pynbait ya kam kini ki aiñ næ ki kyndon u man ko ha u Governor yong ka jylla ym ha u President wei ini daw pynsuk ko yei rukom krehkaam wei pynjan leh wow pynsñiaw ya i sur dawa yong i kam ki tre ri.

Da ong wa kamwa da yoo wa hanla ka sorkar jylla ha ki snem wa da dep mynjur ko ya ka rai namo ka Resolution wow dawa pynsangeh ya i pynkrehkaam ya ki aiñ kam ka MMDR Act 1957 wa ka Forest Conservation Act, 1980 tangwa u President yong ka ri India ym ye u wow pdiang wei ini da ye ko wow wanrah yei eh ya ki tre ri.

I wa ar i dawa toh wow pyndooh noh ya i kyndon wa e laad ya kiwi won ki jaitbru wow chah thung kam ki Nominated MDC ha KHADC wa GHADC lyngba i wanrah ya ki kyntien “Nomination of Unrepresented Tribes” ha ini i pynkylla ya ka 6^th Schedule. Da ong wa ini daw wanrah ya ki kynrum kynram neibhah ya ki ADC da chna khnang neibynta wow yada ya ki khian paaid, ki tre ri, wei ini i thmu wow thung yabor ya kiwi won ki jaitbru ha ki District Council toh iwa pynyoo wa em iyi iyi cha kylla wei ya ini ym ye wow pdiang.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Iwa le won toh yow pyrchah yei thmu wow pynman ya ki dorbar ki tre ri ki yong i kam ki Panchayati Raj wa kamjooh leh ki Municipal Council lyngba i wanrah ya kitæ ki Village Council ha kani ka Amendment. Da pyrchah neidaw wa ka jaitbru ka yong i da em ko ya i rukom synchaar khadar kawa rap phær na kiwi ki jaitbru wei ini iwa da yoh leh toh deiwa yoh yada lyngba ka 6^th Schedule. Kamtæ da ong wa ini i thmu wow pynkylla toh iwa thmu wow pynyahaap dor wa kitæ ki rukom synchaar ha ri Thor wei daw pyndooh yabor ya ka synchaar ka yong i. Hajrong ini da maham ya ka sorkar India wa ym toh u wanrah ya kam kini ki kyndon kiwa ye u ktah ya i long i man wa kyrpang ka yong i ki tre ri heithaw wow pynkup bor chooh chooh ya ki dorbar tre ri ki yong i lyngba ka Direct Funding wa kiwi kiwi.

Khaddooh khatwai, da dawa wa ka sorkar India toh u burom ko yei sñiaw yong ki ADC, ka sorkar jylla, ki kynhun seiñbhalang wa ya ki tre ri tre chnong hi waroh kiwa em ha ka jylla wei ym toh wow wanrah ya kiwon kiwon ki kyndon ki wow ktah ya i long kyrpang i yong i lada dei wym ap wei deiwa leh donbor.