Ka Meghalaya High Court da chong bichaar biang ko ynnin ka sngi ya ka mukotduma PIL kawa yatoh wa i kit palatpood ki kari deiwa ong wa hadooh katni uwa yaleh mukotduma da ong u wa ymem leh ka sorkar iyi iyi leh wei neh kamjooh bait.
Ka sorkar jylla da pyntip ko wa hadooh katni da em kamwa 16 tylli ki Weighbridge hapoh ka jylla waroh kawi kiwa krehkaam wei ini daw ku i cha 23 tylli kat u kut uni u bnai.
Ka High Court da ong ko wym em ye u len wa ha kiwa boon ki thaw ka jylla khamtam ha thaaiñ Pynursla, Shella, Dawki wa Nongstoin ki kari wa kit moo, kit chyiap toh kiwa da kit hadooh wa dap chroit wei ki Truck wa heh wa kmai da leh ki yeini khlem em wa khang ya ki deiwa khlem bood ya ki kyndon wei kini ki kari em ki por ki wym em tang i Number tangwa ki bor wa toh u pait yeini da leh thlah ki.
Da kdaw leh wa khamtam ha thaaiñ Pynursla da em da ki hajar tylli ki Truck kiwa da pynyieñ heijooh i por kiwa kit moo, kit chyiap cha Bangladesh wei ymem tang kawi leh wa bood ya ki kyndon kit mar katwa ha kiwi won ki thaw toh ki kari wa kit dieñ.
Chooh chooh da ong leh wa da em kiwa bien wow tymmoh yeiwa kit ki tangwa ini won da yoh laad ki wow murieh ya u mooyong wa kit ki wei ymtoh ware wow yada nei haap u moo na ka Truck. Tangwa da yoo maa won ki kari wa kit moo neibhah lada hap sangeh ki syndet syndet ye ki moo u haap ha ki kari wa bood nadien kamjooh leh ye u yap ki bru wa lai dei kjat.
Ka sorkar da ong ko wa da pynkhreh ko wow thied da ki Electronic Weigh-Pads kiwa chongdor T. 27 lak tangwa ka yung bichaar da ong ko wa deiwa kheiñ yei lut wow chna chi kilometre u sarok khamtam ha kini ki ri-loom wei deiwa kheiñ leh yei joor slap 6 bnai chi snem, ymtoh wow e daw u pynslem wow leh yeini yow pyndooh ya kini ki kaam wa da ktah ya ki luti syngkieñ.
Kamtæ ka High Court da phah ko ya ki Superintendent of Police wow phah ki wow pait ya ini i kaam hanla dei khmat leh tip bait kiwon kiwa kit palatpood neibhah chisien wa da sdang leh yeini deiwa ksoh truck, kiwi leh daw sdang ki wow bood kyndon deiwa phah pynhaap ya iwa da kit pyntam ki.
Hajrong ini waroh, ka yung bichaar da pynsñiaw ko yei wym hun yei leh ka sorkar yow pait ya ki kari wa kit palatpood wei da kyrmen ko wa daw leh ki yei kaam wa toh u leh wei wow phah leh ya ka Report ha kini ki 4 tayaaw.
Ya kani ka mukotduma daw chong bichaar biang ha ka 03-05-23.
