Ynne ka sngi, ka Jaiñtia National Council (JNC) hapoh i yahkhmat u President wa khliehdooh ka seiñ, u Sambormi Lyngdoh da lai hiar ki cha Meghalaya Cement Ltd (Topcem) wa em ha Thangskai, East Jaiñtia Hills hajrong iwa jia ha ka 24 tarik ha ka Public Hearing kani ka karkhana.
Hawa yoh ka seiñ u yachem wa u heh dooh kani ka karkhana da pyntip u wa da beh kreh chipor namo wow Suspend ya ki ar ngut kiwa kreh kiwa da pynchit wei tim sih wei klam khlemakor ya ki paidbah heipor wa kdong ki pulit ya ki paidbah wa wan wow pynyoo yei pyrchah ha kani ka Public Hearing.
Uni u heh kani ka karkhana da puræ u leh ya ka chithi wa paan maap ka MCL na ki paidbah deiwa ong wa ki kwah ki wow pynneh yei suk i saaiñ wei da kular u leh cha ka seiñ wow e yarap bai dawai ya kitu kiwa mynsoo ha ini wa jia heipor ka Public Hearing.
Tangwa neiliang ka seiñ da ong ko wa ym hun ya ini i beh kreh wa du chipor donhi wei da dawa wow beh kreh syndon ki napoh kani ka karkhana wei ymtoh de wow chah u kreh ki hapoh kani ka karkhana wa em hapoh East Jaiñtia Hills District.
Hajrong ini, neiliang u heh kani ka karkhana da ong u wa daw rah yeini i kaam cha kiwa em rap chaneiñ wei da kular u leh ha ka seiñ wow beh kreh hi deiwa chi rta ya kini ki ar ngut.
Puræ leh: Beh kreh ka Topcem ya ki ar ngut wa pynchit wei klam khlemakor ha ka Public Hearing
Discussion about this post