Ka yung kasari u Additional Deputy Magistrate ka East Jaiñtia Hills katni dang bichaar ko heiyatoh wa ka mukotduma Non-FIR Case No. 01/2022 hapoh ka kyndon 133 ka CrPC wa da ujor heiyatoh wa i sih u sarokbah NH06 khamtam ha Khliehriat.
Ka kasari hawa chong bichaar ha ka 16 tarik u Naikhynde da ong ko wa ym hun ko yei jubab wa da e da u Regional Manager, NE, NHAI wa u Project Director, PIU-Shillong, NHAI heiyatoh wa ki kaam wa da leh heiyatoh wa i chna ya ki bynta u sarokbah wa da sih deiwa kdaw leh ya ka bui wa da e da u SP ka District yei boon i kylla kari wa i tyrrah kari du neidaw wa sih u sarok.
U Regional Officer(NE), NHAI deilang wa u Project Director, NHAI, PIU, Shillong hawa e jubab da ong ki wa neidaw wa joor u slap ym ye wow pynchna ya u sarok wei waroh iwa da pynchna ki deiwa siang moo wa i psiang da rah lut u slap ki.
Heiyatoh wa ka Khliehriat da ong wa i ym biang dooid da wanrah yei chlai um ha ki bynta ka yaaw Khliehriat wei da pyndep u chna ya ki dooid wa sih ha ka 20-09-22 wei i siang psiang won ym ye u pyndep neidaw wa joor slap wei daw pyndep manda rang.
Da ong leh wa u Contractor wa da thung ki yow pynchna ya u sarok ym ye u wow kreh katkam wa da phah wei dei yooluti wa deiwa wai noh ya ka karkhana ka NHAI ha Myngkre daw ye u siang psiang hadooh 200 Meter chi sngi wei daw ye u pyndep yeini ha ka 31-10-22.
Ka kasari hadien wa ap ya ini da ong wa ka NHAI ym em u chimkhia ko wow kreh smat ya ki bynta wa sih uni u sarokbah nadooh u Naisan.
Chooh chooh da ong wa ka NHAI ym em u kheiñ ko ya i bor u Contractor wa ki kreh wa da leh u neibhah wa da man kiwa suki wei iwa da ktah ya i por ki paidbah.
Heijooh i por da ong wa neidaw wa uni u sarok NH06 pynyabi u ya ka Barak Valley, Assam, Manipur wa Mizoram khamtam hei lai i wan wa i khayi pateiñ da chem wa ym em i rukom pynkhreh wa paka deiwa kheiñ leh yei i long i suiñ bneiñ.
Kam wow kdaw heini ya kani ka mukotduma da ujor ha u Naiynñiaw yong uni u snem da kiwa chnong chnong ka Sonapyrdi, Chiehruphi, Khliehriat East wa da ka seiñ EJNC.
