Ka KSU Narpuh Circle hadien wa da yoo yei ya soi soskular (MoU) hapyrdi ka sorkar Assam wa sorkar Meghalaya hadien wa pynbait lang yong ki Regional Committee wow pynbait ya u pood u ang hapyrdi ki ar jylla.
Ka seiñ da ong ko wa i pynbait pood hapoh East Jaiñtia Hills District ha Malidor, ya iwa da pyrchah joor neibhah wa ka sorkar jylla Meghalaya da e sñiawbha ko ya ka yingkieñ waka wah Malidor cha ka Assam. Wei dang ha kini ki kajiak tayaw wa dadep, ka seiñ da yoo wei da yoh yutip ko leh hajrong ini i ya soi MoU hapyrdi ki ar jylla, kamtæ ka seiñ hapoh i yahkhmat u Phanuel Tongper, Vice President da lait hiar ki cha Ratacherra yow yachem ya kiwa yahkhmat chnong.
Ha i yachem wa u waheh chnong ka Ratacherra, u D. Pohshna uwa man leh u MDC warim ka thaaiñ Narpuh da pyntip u wa chwa wow ya pynbait pood wei ya soi MoU hapyrdi ki ar jylla, ka Dorbar Chnong Ratacherra da dep phah chithi ko cha ka Regional Committee wow dawa na ka sorkar wa u pood wow ya pynbait toh u kheiñ na pyrdi ka wah Malidor wa na mar chiteiñ ka yingkieñ iwa mut ka sorkar Assam wa Meghalaya u man ki kam ki tre kitai ki thaw wow man kam ka Natural Boundary yow pynneh pynsah ya ka wah Malidor wa i em waroh deilang wa ki mar poh khyndaw.
“Tangwa khlem poi pyrkhat ka sorkar jylla da e sñiawbha ko ya ka yingkieñ wa chilynter ka wah wow mantre ka Assam,” da ong ka seiñ.
Ha ka yasoi MoU, da yoo wa ka sorkar Assam da kular ko wym chah u pynman thaw khayi namo ki Commercial Activity ha katu ka thaw kam i tih moo, tih chyiap.
Ka chnong Ratacherra da khyrngiat ko wow yoo ya itai i yasoi iwa khlem da ap ya katai ka chithi wa da phah. I kam yong ka sorkar Assam wow yoh ya ka yingkieñ wa ha waroh chilynter ka wah deiwa kular ya ka sorkar Meghalaya wym pynman ya ki Commercial Area, toh du wow pynbiej ke.
Ka seiñ da ong ko wa da sakhi da waroh wa wot hapyrdi i kajia pood hawa ym pu ye u pynbait ya u pood u ang. Ya u moo heitai da khloh lut war, wei hadooh katwon won manda yoh u mantre ya ka thaw. Ka Meghalaya ym em hok de ko wow tuklar neibhah da dep dai cha Assam, wei ini khlem pep daw booh ko hei maa ya ka jylla yong i.
Da ong leh wa ha i pynbait pood, da yoo wa ka chnong Ratacherra, Malidor wa Ampyrdi u haap ki chapoh Meghalaya, iwa da yoo phylla wa toh neidaw wa kini ki chnong da em chwa ki cha Meghalaya wei ym jooh em i yaknieh næ i kajia pood ha kitai ki chnong.
Ha itai i pynbait pood, na chiliang mihsngi wown toh lyngba u Pillar 139 wei da yahun waroh arliang mamla wa waroh ki bri pathi, bri kwai wa kiwi kiwi ki jait wa da thung yong ki tre chnong u yoh lut waroh.
Hawa yaklam ka seiñ wa u waheh chnong, da ong u wa ka chnong Ratacherra ym hun ko ya iyi wa ka sorkar leh ko cha lyndet ya ka chithi wa da phah wei da dawa wow pynbait ya ki kyntien (Wording) wa u pood toh u kheiñ bait napyrdi ka wah.
Hawa yatoh won wa ka Borial Wildlife Sanctuary, kani u neh ko kamjooh hapoh i pait ka chnong waka sorkar jylla.
Puræ leh: Dang pteiñ ki nong Assam wow khloh moo na wah Malidor
Puræ leh: E FIR ka KSU hadien wa pteiñ i khloh moo ki nong Assam naka wah Malidor
