Ha ka mukotduma Public Interest Litigation wa da ujor da u khynroo muktiar u Kynjaimon Amse heiyatoh wa u sarok Borkhat-Sonapur Road, ynne ka sngi ka yung bichaar High Court ka Meghalaya da chong bichaar ko ya kani ka mukotduma
Kam wow pynkynnoo heini uni u khynroo da boodien u yei pynkreh smat ya uni u sarok uwa T. 130 klur na ka DoNER Ministry ka sorkar pyrdi tangwa hadooh katni ympu em u chna ya oo iwa da pynbor ya ki paidbah ki chnong ka thaaiñ wow chim ki ya ki kaam pyn ha kti yong ki hi.
Neiliang ka High Court of Meghalaya neipor cheipor da paan yutip ko na ka sorkar jylla wa na ka DoNER Ministry hajrong i kreh ya u sarok Rymbai-Bataw-Borkhat-Sonapur Road hapoh ka NERSDS, uwa T. 130 klur tangwa khlem yoh iwon iwon i jubab.
Ynne ka sngi kani ka yung bichaar da sñiawkhia ko ya ini i kaam neibhah wa ym mano ka sorkar wow leh yeiwa emkaam iwa da ktah ya ki paidbah wei da paan yutip ko na u Chief Engineer, PWD (R) hajrong ini wei daw chong bichaar biang ha ka 18 tarik uni u bnai.
Neiliang u Kynjaimon da ong u wa ki bru ha ka sorkar da kular ma kular ki khlem mih soh mih sla neibhah ini man i iwa angnood bha ki paidbah ka thaaiñ wow pyndep smat yei kreh.
Da ong u leh wa ki paidbah kyrmen ki wa ka sorkar u booddien ko yeini i kaam wa ka DoNER Ministry khlem chong kli-kti.
