Ynnin ka sngi ka seiñ Meghalaya People United Front (MPUF) Shangpung Unit da lai yachem ko ya ka EE yong ka PHE Swachh Bharat Mission wa ya u Deputy Commissioner ka West Jaiñtia Hills yow tip kammon da pynchitom ya ka Village Water Sanitation Committee (VWSC) kawa da pynkreh khalær ya ka Scheme Solid and Liquid Waste Management (SLWM) haka chnong Shangpung Mission.
Hawa yaklam ka seiñ wa u DC da ong u wa da dep phah ya ka yung krehkaam ka PHE wow pynchitom katkam ki kyndon yong ka Scheme.
Ha i yachem won wa ka EE, da phah yachem ko wa ka District Co-Ordinator wei hawa yaklam wa ka District Co-Ordinator, da ong ko wa da phah ya ka VWSC wow pynuiñ noh ya ka poisa kawa 21% ka wym pu dep kreh hapoh chitayaw.
U Daroiki Iakai uwa man leh u Vice President da ong u wa ka seiñ hi ka pyrchah wei ym hun ko du wow pynuiñ ya ka poisa wei da dawa wow pynchitom da iwa rap eh ya kani ka Committee.
U Kenneth Anderson Iakai u General Secretary da ong u wa katni ka seiñ daw chong pyrkhat noh ko wow thooh da kawi ka luti neibhah wa neiliang ka PHE ym leh ko ya iwa emkaam pyrchah ya kani ka Committee.
Kam wow pynkynmoo wa ka seiñ da chem ko lyngba ka RTI wa i pynkreh ya kani ka Scheme toh em kiwa ym pu em dep katwa yaka poisa da pynlait.
