Ka Angela Rangad hawa klam hajrong i chah pynyap u Cherishsterfield Thagnkhiew ha ki pulit ka Meghalaya da ong ko wa katkam wa da batai ka aiñ, ka Meghalaya Human Rights Commission (MHRC) da i bor yong ka hi da chim ko rai wow pynman ya ka takit namo ka Inquiry katkam ki kyndon wa da batai ka aiñ ya ka MHRC.
Tangwa hadien kattu katni sngi, u Montri Rangbah ka jylla da pynbna u wa daw booh ka Inquiry Commission heiwa u Chairperson yong ka MHRC hi wow khlieh ya kani. Kamtæ da ong ko wa kani ka Commission da kawon ka kyndon hap ko wow bood neibhah hawa kut ka Commission ye ko du wow tyrwa cha ka sorkar iyi wa ye ko wow leh kam wow beh kreh tangwa palat ya ini ym ye ko wow pynchitom katkam ka aiñ. Iwa mut wa i takit yow pynchitom u ye u leh du deiwa em ka FIR.
Wei da sñiawsuk wow sñiaw wa na kiwa hayung hasem u Thangkhiew da dep ki wow e da ka FIR neibhah deiwa em ka FIR daw ye u em ka takit (Criminal Investigation) ya kiwa tyngkheiñ aiñ kiwa pynyap ya u Thangkhiew wei wow pynsaja ya ki katkam ka aiñ.
Heijooh i por da ong ko wa lada ya kani ka takit da leh da ki pulit kiwa napoh ka jylla, daw ye ko mo wow man kawa khooid wei kam ki paidbah toh u pynsñiaw cha ka sorkar wow booh ya kiwa takit (Investigation Team) kiwa man laitlood heiwa ki pulit kiwa takit toh u wan da kiwa na baar kiwa ye u man da kiwa jied da ka CBI wei ye u em uwi u dkhot ka National Human Rights Commission.
Da ban joor ko leh deiwa ong wa lada dang leh da ki pulit wa em hapoh ka jylla hi, daw hap ki wow jubab ya ki heh ki haaiñ kiwa pait ya ki hi, kamtæ hadooh katwon u man ki kiwa laitlooid wa kiwa chlur wow leh ya ka takit kawa khooid.
Da e nongmuna ko leh ya ka hukum wa da pynmih da ka Supreme Court hawa yatoh wa kam kini ki jait chah pynyap ha ki bor ka aiñ iwa da jia ha Manipur heiwa da em ka hukum wa pynmih kawa da ong wa toh u bichaar da kiwa na baar neibhah ki pulit ka Manipur ym biang ki wow bichaar ki ya kam kini ki kaam khang wow yoh leh yei chaniah na ki paidbah heiwa ki paidbah leh toh u ngait ki wa i takit leh man i iwa hok.
Da pynkut ko deiwa ong wa e ka takit ka Commission u lai ko chakhmat tangwa boon ki por iwa chem ki toh i wym jooh pdiang hapoh ka yung bichaar.
