Ka Federation of Khasi Jaiñtia & Garo People (FKJGP) da beiñ joor ko ya ka sorkar Meghalaya Democratic Alliance (MDA) hajrong i kyntait wow chim i kitkhlieh heiyatoh wa i eh i khoo wa yachem ki Frontline Worker kiwa yoh COVID-19.
Ka FKJGP da pynbaad ko yeini hadien wa yoh yutip ko wa ki Frontline Worker wa yoh COVID-19 katni kiwa em ha ki Hospital wei kiwa chong-kset ha ka Corona Care Centre, Umsawli hap tip wei bahkhlieh ki liang wanang yei emkaam ki wa kynthup ya i baam i dih wei hap su ki wot ka bai thiah kjut næ ka bai dawai.
“Ym kamwa man ha u snem 2020, ha kani ka kynti, ka sorkar ym em pynkhreh ko ya ki thaw sah wa kyrpang ya ki Frontline Worker wow chong kset ki hadien wa da yachem ki ya kiwa chitom COVID-19. Hawa kamni ileh ym booh i hei maa mo ya ka yung ka sem waroh”, da kylli u President ka FKJGP, u Wellbirth Rani.
Da ong u wa ini i leh ka sorkar ym chonghok i wei da man i kamwa yoobeiñ ya kiwa kreh haphrang dooh wow yakhun ya kani ka khlam. “Phi pynemkaam phi ya ki Frontline Worker kam ki chipai wow toor chakhmat tangwa manda yoh kjut ki kyntait phi ki, ym chim phi yei bahkhlieh, chong hok hi mo?”
Da ong u leh wa lada kini ki Frontline Worker hap pynlut ki na kata wow sumaar pyn daki yaki hi wei wow pynbiang yeiwa emkaam ki, kammon won u leh ka sorkar manda chait ki, daw phah biang ko ya ki næ kammon?
Chooh chooh da e nongmuna u ya kiwa kreh ka EMRI 108 kiwa kit ya kiwa yoh COVID-19 man-ka-sngi, kiwa yachem ya kiwa kjut man-ka-sngi wei hadien wa dep kreh da hap liwan ki cha yung wei ini booh i hei maa ya kiwa hayung hasem. Deiwa pynrap wa ka sorkar da toh i por wow khoom u kdoh ko yei poor kani ka khlam.
Neiliang ka FKJGP da dawa ko na ka sorkar wow kitkhlieh hei wow pynbiang noh liang wanang ya i emkaam ki Frontline Worker kamwa da leh ha u snem 2020 yow lait kani ka khlam u poor.
Heijooh i por, da kyrpaad u ya ki paidbah ka jyllla wow ksohkti lang wa ka sorkar wow yakhun ya ka khlam wei wow bood ryntih ya ki kyndon wa booh ka chnat i chait i khiah wa ki bor District.
